Caras conburgheisas e cars conburgheis
Dapi varga 150 onns vegn il mandat per la Rogaziun federala dalla
Regenza prelegius en las baselgias da nies cantun. Il mandat dalla
Rogaziun federala duei manifestar il ligiom denter baselgia e stadi e
far attent alla muntada dallas valurs fundamentalas cristianas per igl
agir dil stadi. Uonn pren la Regenza la caschun da far entginas
reflexiuns fundamentalas concernent la relaziun actuala denter la
baselgia ed il stadi, denter la religiun e la societad.
La societad dad oz ei pli e pli caracterisada d'ina munconza
d'orientaziun. Valurs dalla convivenza sociala, tochen oz fermas e
solidas, svaneschan senza ch'ellas vegnan remplazzadas dad autras valurs
equivalentas. Il patertgar ed agir solidaric vegn supprimius pli e pli
d'in individualissem marcant, ch'ei la consequenza d'ina survaletaziun
dalla libertad persunala sco valur fundamentala. Fatgs ni causals ch'ein
per la societad e per il stadi decisivs e d'eminenta muntada, vegnan
stuschai dalla vart sco caussas dil tuttafatg privatas. Decisiuns davart
valurs, fixaziuns da valurs, orientaziuns da veta e perschuasiuns duein
esser exclusivamain caussa privata e privadas dalla discussiun en la
publicitad. Sin la liunga sa la societad denton buc exister senza in
consens ligiont pertuccont las valurs. Igl ei perquei il grond ed a
medem temps il pretensius pensum dalla baselgia d'intermediar en nies
temps a la societad ed a ses members sin la basa dalla ductrina
cristiana valurs eticas e moralas fundamentalas ed aschia influenzar
positivamain nossa convivenza. Quei succeda en emprema lingia tras igl
exempel viviu. Igl engaschament social dalla baselgia ei ina provocaziun
permanenta mo era publica e politica: numnadamain da buc schar curdar
ils fleivels, ils malsauns e disavantagiai. L'orientaziun etica e la
cunscienzia dalla societad e dil singul vegnan promovidas e sustenidas
tras las posiziuns claras e precisas dalla baselgia en damondas
impurtontas dalla veta. Quellas posiziuns ein in element necessari per
formar ils meinis. Il stadi vegn buca adina e dapertut a saver suandar
la vusch dalla baselgia; igl ei denton prudent dad el da tedlar
attentamein quella vusch e da tener quen dad ella en sias decisiuns. Mo
sche la baseglia ed il stadi coopereschan a moda constructiva, eis ei
pusseivel da sligiar ils problems cumplexs cun ils quals nossa societad
ei confruntada.
Il di dalla Rogaziun federala duess perquei esser per nus tuts ina
caschun speciala per far entginas ponderaziuns davart la conseqenza da
certs svilups dalla societad e da puspei ina gada seregurdar da las
valurs fundamentalas dalla cardientscha cristiana: dalla carezia
proximala, dalla toleranza, dil quitau per il proxim e dalla giustia.
Quellas valurs fuorman las premissas fundamentalas per ina vera
cuminonza statala. Nus vulein ponderar, tgei che mintgin sa contribuir
concretamein sin siu post, en la famiglia, en la professiun, en
funcziuns publicas ed en uffecis, per che quellas valurs semanifestien
puspei en nossa societad. Lein empruar d'agir mintga di tenor quels
principis era leu, nua che quei va pli vess a nus. Nus appellein a Vus
tuts da s'engaschar per quella finamira!
Cun questas ponderaziuns recumandein nus Vus, caras convischinas e
cars convischins e tut nos concarstgauns alla protecziun dil Tutpussent.
Cuera, il settember 1998 En num dalla Regenza
Il president: Luzi Bärtsch
Il cancelier: dr. Claudio Riesen
Gremi: Regenza
Funtauna: rg Canzlia cantunala dil Grischun