Sumegliantamain a las buttiglias da PET duai esser cuntegnida en il
futur er tar las buttiglias persas ina taxa d'allontanament en il
pretsch da cumpra.
La rimnada e l'economisaziun dal vaider vegl chaschuna en l'entira
Svizra custs annuals da circa 30 milliuns francs. Uss na duain betg pli
surprender las vischnancas, mabain directamain ils chaschunaders quests
custs. Il departament federal per ambient, traffic, energia e
communicaziun (DATEC) vuless midar correspundentamain l'ordinaziun
davart ils emballagis per bavrondas. En il pretsch da cumpra da
buttiglias da vaider duai esser cuntegnida novamain ina taxa
d'allontanament anticipada. Questa taxa vegniss a muntar per buttiglias
da vaider sur in mez liter tranter quatter e diesch raps, per buttiglias
pli pitschnas tranter dus e tschintg raps.
La regenza grischuna è da princip perencletga cun la revisiun totala
previsa. Ella beneventa specialmain la taxa d'allontanament anticipada.
Ultra da quai dat la regenza impuls per resguardar meglier ils suandants
postulats: la quota dals emballagis nunutilisabels per bavrondas
ch'arrivan en il rument, duai restar zunt pitschna ed ils emballagis
reutilisabels duain vegnir promovids intenziunadamain. La regenza n'è
betg d'accord cun l'idea d'abrogar il scumond da buttiglias PVC, dentant
d'introducir in pegn. Il PVC è e resta ina materia problematica, en
l'industria da bavrondas ha el pers sia giustificaziun.
Il Grischun refiera la taxa per sanar deponias veglias
Cun la taxa planisada per sanar deponias veglias vuless la
confederaziun finanziar 40 pertschient dals custs dals chantuns ch'èn
necessaris per sanar deponias, manaschis e lieus d'accident. Las taxas a
la confederaziun duain vegnir prestadas dals possessurs da deponias da
rument en Svizra e dals exportaders che deponan ruments a l'exteriur. A
basa da l'autezza previsa da las taxas e dals ruments deponids
annualmain vegnan imponidas las deponias da qua probablamain cun taxas
da pli ch'in milliun francs per onn. Perencunter po far quint il chantun
cun in return da be 800'000 francs. Uschia stuess il Grischun
confinanziar la sanaziun da deponias veglias en auters chantuns en ina
dimensiun considerabla, senza avair chaschunà er el quests custs.
La regenza refiera perquai er energicamain il sboz per ina
ordinaziun davart la taxa per sanar deponias veglias. Essenzialmain
explitgescha ella che la taxa previsa na saja betg necessaria e ch'ella
chaschunia ina repartiziun massiva sin donn e custs da chantuns cun
damain cas da sanaziun. Ultra da quai na saja la taxa betg confurma al
chaschunader e chaschunia in augment inutil da l'apparat administrativ.
Da las vischnancas
Las revisiuns parzialas da las planisaziuns localas da Degen,
Ruschein, Samedan, Schluein, Uors-Peiden, Valragn e Zuoz vegnan
approvadas.
Il project da construcziun per meglierar la plazza da sport
exteriura a Val S. Pieder vegn approvà definitivamain. Als custs
imputabels da var 129'000 francs empermetta il chantun contribuziuns da
construcziun da diesch pertschient.
Per differents projects da construcziuns da vias en il chantun èn
vegnids dads libers credits d'in import total da 4.8 milliuns francs
(installaziuns electricas per l'illuminaziun e per l'indriz da cabel da
fibra da vaider en il tunnel dal San Bernardin, sanaziun/construcziun
nova dal mir e dals mirs da sustegn Tröglitobel sin il traject
Ziràn-Tusaun da la A13c, prolungaziun dal trottuar ad Andeer, lavurs da
construcziun e da cuvrida sin la via taliana Piazza-Resgia de Scima,
correcziun da la via d'Alpsu traject parzial Vals Segnas-Pignola,
transfurmaziun da la plazza da la staziun da Scuol).
Nov schef da l'uffizi da sanadad
Rudolf Leuthold è vegnì elegì sco nov schef da l'uffizi da sanadad.
El è naschì l'onn 1962 ed abita a Grüsch. Da 1991 fin avust 1998 ha
Rudolf Leuthold lavurà en la partiziun da perscrutaziun e da svilup da
la Hamilton Panaduz SA. L'entschatta da l'onn 1996 ha el obtegnì la
responsabladad totala da la partiziun da software aifer la partiziun da
perscrutaziun e da svilup. Dapi settember 1998 lavura Rudolf Leuthold
tar la Krupp Presta SA ad Eschen sco manader da svilup en la partiziun
d'alvers d'empalms. Rudolf Leuthold cumenza ses uffizi l'entschatta
2000.
Fatgs dal persunal
Maria Tscharner, Sched, emploiada da chasa en la chasa da dimora
Giuvaulta da la clinica Beverin è ida en pensiun la fin da fanadur 1999.
La regenza engrazia per ils servetschs ch'ella ha prestà en favur dal
chantun.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun