A las elecziuns cirquitalas da l'onn 2000 vegnan ils circuls da
Cuira, dals Tschintg Vitgs e da Maiavilla ad obtegnair mintgamai in
mandat supplementar en il cussegl grond, e quai sin donn e cust dals
circuls da Mesauc, da Puschlav e da Tusaun. Quista consequenza resulta
da las statisticas da la confederaziun ch'èn vegnidas publitgadas da
curt. Il fatg decisiv, co ch'ils mandats dal cussegl grond vegnan
repartids sin ils circuls, è numnadamain la populaziun svizra dals
circuls sin fundament da la statistica federala che vegn publitgada
mintgamai l'onn avant las elecziuns cirquitalas. Per las elecziuns
cirquitalas 2000 vegni sa basà uschia sin las cifras publitgadas l'onn
1999, q.v.d. sin il stadi da la populaziun dals 31 da december 1998. La
procedura da repartiziun (l'uscheditta procedura per fracziun
electorala) garantescha in mandat als circuls pitschens e regla dal rest
la repartiziun proporziunala dals mandats ch'èn anc avant maun sin ils
circuls restants. En total resultan uschia las midadas da mandats
menziunadas.
Medias e democrazia
Envers la confederaziun prenda la regenza posiziun pertutgant las
novas disposiziuns planisadas en la constituziun federala (CF) che
pertutgan las medias e las mesiras da la politica da pressa. Sco basa
per las novaziuns valan ils dretgs fundamentals da la libertad
d'opiniun, d'infurmaziun e da medias. Il radio e la televisiun èn gia
cumprendids en la CF, perencunter manca in artitgel specific per la
pressa. Il sboz prevesa in artitgel da basa (art. 92bis CF) che
constatescha ils aspects generals da la politica da medias. A quest
artitgel suondan las disposiziuns constituziunalas pertutgant la pressa
(art. 92ter CF) e l'artitgel gia existent pertutgant il radio e la
televisiun (art. 93 CF). Tenor il sboz vul la confederaziun promover la
varietad e l'independenza da las medias sco er la qualitad da la lavur
jurnalistica. Ultra da quai duai el obtegnair tranter auter la
cumpetenza da pudair eventualmain obligar ils editurs ed ils
organisaturs da render transparentas las participaziuns a lur
interpresas sco er da crear in organ da mediaziun che duai pacifitgar
dispittas tranter persunas privatas sin il sectur da la pressa. Da nov
duai vegnir fixà er l'uschenumnà "princip da publicitad" per actas
uffizialas da la confederaziun. Cun las novaziuns na vul la
confederaziun betg intervegnir directamain en il martgà, mabain
cuntanscher ina tscherta direcziun en il senn dals interess da la
politica statala. La diversitad da las opiniuns en la democrazia duai
vegnir mantegnida resp. promovida. Ils novs princips constituziunals
duessan anc vegnir concretisads en ina lescha davart las medias.
La regenza grischuna suttastritga che medias equilibradas èn la basa
fundamentala per ina furmaziun da l'opiniun libra ed objectiva ed uschia
d'impurtanza centrala per ina comunitad democratica che funcziunescha.
Ella beneventa perquai er las finamiras ch'ins emprova da cuntanscher
cun la revisiun da la constituziun planisada. Dentant è ella conszienta
che las mesiras statalas sin il sectur da las medias èn difficilas. Per
quest motiv pari gist ad ella, che las mesiras che pertutgan la politica
da pressa han surtut in effect indirect, da sustegn e betg intervegnent.
La finala gioga l'observaziun da la libertad da pressa per il chantun
Grischun triling ina rolla impurtanta, e quai er per motivs da la
politica da lingua.
Da las vischnancas
La regenza approva la midada da construcziun dal bain immobigliar
Loestrasse 26 a Cuira. L'anteriura scola da dunnas è proprietad dal
chantun e vegn utilisada dapi l'entschatta d'avust 1983 sco center
transitori per requirents d'asil. Il vegl edifizi dovra ina sanaziun.
Ils custs sa muntan a var 1.3 milliuns francs e vegnan prefinanziads da
l'uffizi federal per fugitivs.
Approvadas vegnan las revisiuns parzialas da las planisaziuns
localas da Pasqual, Preaz, Tarasp e Vaz sco er cun resalvas la revisiun
totala da la planisaziun locala da Rossa.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun