En collavuraziun cun l'uniun grischuna d'artisanadi e mastergn ha
l'administraziun chantunala elavurà in concept davart la protecziun
cunter mulestas sexualas. Central è in fegl d'infurmaziun, en il qual
las mulestas sexualas vegnan definidas e scumandadas expressivamain.
Dapi l'entrada en vigur da la lescha d'egualitad mez 1996 vegnan las
patrunas ed ils patruns obligads expressivamain da prender mesiras per
impedir mulestas sexualas en lur manaschi. Sch'els tralaschan quai, alur
pon els vegnir fatgs responsabels per l'existenza da tals fatgs. Uschia
è quai succedì p.ex. l'onn 1998 en il cas d'in hotel a Turitg, nua che
betg mo il mulestader sez, mabain er la direcziun da l'hotel ha stuì dar
pled e fatg avant dretgira.
En questa situaziun s'occupa uss er l'administraziun chantunala sco
patruna dal tema "protecziun cunter mulestas sexualas". Il post da
consultaziun entaifer l'administraziun per dumondas da dunnas sco er il
post da stab per dumondas d'egualitad han fatg quai en collavuraziun cun
l'uniun grischuna d'artisanadi e mastergn. La collavuraziun sa basa sin
l'idea, ch'igl è bun da metter a disposiziun ina basa generala als
numerus manaschis en il chantun. Gist manaschis pli pitschens e mesauns
na ston uschia betg sviluppar sezs mintgamai in agen concept e pon tras
quai ademplir lur duair senza gronda lavur.
Mulestas sexualas èn in tema delicat. Tant pli impurtant èsi da na
betg tabuisar ellas, mabain da tematisar las violaziuns dal cunfin. Sin
il fegl d'infurmaziun elavurà vegni dà ina definiziun e per illustrar
quella vegnan menziunads plirs abus pussaivels. In criteri decisiv per
las mulestas è quel, ch'ellas na vegnan betg giavischadas da la persuna
pertutgada. I sa tracta pia surtut dal fatg, da vulair respectar
vicendaivlamain ils cunfins individuals en l'ambient da lavur.
Dal rest regla il fegl d'infurmaziun er la procedura, sch'i dat in
cas da mulestas sexualas. Per l'administraziun chantunala èn vegnidas
designadas duas persunas da contact en l'uffizi da persunal e
d'organisaziun. Quellas vegnan ad esser il post da consultaziun. En ils
manaschis sto fixar mintga patruna e mintga patrun sez, co ch'el vul
tractar in tal eveniment ed el sto communitgar quai correspundentamain a
las lavurantas ed als lavurants. L'effect preventiv giavischà po
natiralmain vegnir cuntanschì be, sche tut las collavuraturas ed ils
collavuraturs d'in manaschi èn infurmads davart il tema.
Gremi: biro d'egualitad dal Grischun
Funtauna: rg biro d'egualitad dal Grischun