Il dumber da las dumondas per asil è s'augmentà a moda extraordinaria durant l'onn passà. Oravant tut a partir dal settember 1998 è il dumber da fugitivs sa midà radicalmain entaifer curt temp. Durant ils davos mais da l'onn passà èn vegnids mintgamai circa 120 asilants novs a Cuira. Tras quai èsi daventà necessari da crear spert trais novs centers transitoris a Cuira, Sedrun e Landquart. Transitoriamain han ins er duvrà in stabiliment da protecziun civila per l'alloschi a curt termin dals requirents d'asil.
Durant ils onns passads è l'effectiv dals requirents d'asil e cun quai er il dumber da las plazzas d'alloschi en il Grischun sa stabilisà malgrà tut sin circa 1'500 persunas. Per l'alloschament èn stads a disposiziun sis centers transitoris e maximal 80 abitaziuns. Questas èn per part puspè vegnidas reducidas 1997 e 1998, suenter che gruppas pli grondas da requirents d'asil èn puspè partidas, surtut era fugitivs da Bosnia-Herzegowina ch'ins ha prendì si provisoriamain.
Il grond dumber da novas dumondas d'asil, oravant tut la la republica federala da Jugoslawia, ha chaschunà l'onn passà retards er tar l'andament da las proceduras d'asil. Uschia n'han ins durant il davos quartal betg pli pudì observar il termin da 20 dis, prescrit da la lescha, durant il qual l'interrogaziun dals asilants tras il chantun sto succeder. Il grond augment da proceduras d'asil ha ultra da quai chaschunà ina dumonda creschenta per interprets e represchentants da las ovras d'agid. Cun quai èn il medem mument vegnids mess cunfins ad ina cadenza d'interrogaziuns pli auta da la polizia d'esters. Suenter che l'uffizi federal per fugitivs ha sistì il tractament da las dumondas d'asil da la republica federala da Jugoslawia, n'han ils retards en la procedura chantunala almain betg chaschunà ina prolungaziun dal segiurn.
En vista als eveniments da guerra en la republica federala da Jugoslawia ha il cussegl federal ordinà ina prolungaziun da tut ils termins da partenza per persunas da la provinza Kosovo. Tras quai è il process da repatriaziun ch'ha entschavì il 1997 puspè vegnì frenà ed è sa restrenschì sin il repatriament da delinquents. Grazia ad ina praschun da preparaziun e da repatriament a Tavau han ins l'onn passà pudì trametter ord pajais dapli estras ed esters e requirents d'asil delinquents e dissocials. Dal settember fin il november 1998 han ins registrà en la praschun da repatriament a Tavau 500 pernottaziuns. Sin incumbensa da la polizia d'esters ha la polizia chantunala 1998 mess al cunfin 228 persunas.
A moda ordvart plaschaivla ha funcziunà il return dals burgais bosniacs. Cun l'agid da la cussegliaziun da return intensiva èn quasi tut las Bosniacas ed ils Bosniacs partids u viagiads vinavant da libra veglia. Il mument sa chattan be anc singulas perunas da questa anteriura regiun da guerra en il Grischun.
Ord la vista da la polizia è il cumbat efficazi da la criminalitad dals esters ina contribuziun decisiva per cumbatter er l'ostilitad envers esters. L'acziun "STRANICUREZZA", inviada e coordinada dal cumandant da polizia, persequitescha questa finamira e po preschentar in bun resultat. Sco segn positiv per la collavuraziun d'ina entira rait da differents uffizis da l'administraziun chantunala ha l'acziun "STRANICUREZZA" cuntanschì ina quietezza considerabla tar la populaziun.
En il chantun Grischun han gì 1997 e 1998 circa 30 pertschient dals asilants sur 16 onns conflicts cun la lescha. Questas cifras sa basan sin ils rapports da la polizia che cuntegnan er multas e denunzias administrativas sco er rapports da denunzias ord auters chantuns. I na sa tracta damai betg d'ina statistica da sentenziads. Controllas intensivadas, campagnas d'infurmaziun preventivas e puniziun consequenta d'acziuns chastiablas han furmà ils elements essenzials da l'acziun "STRANICUREZZA" da l'onn passà. Dal fanadur fin il november 1998 èn vegnidas fatgas circa 400 controllas da persunas u da vehichels. Cun quellas occasiuns han ins examinà pli detagliadamain circa 2'600 persunas (da quellas 1'288 requirents d'asil) e 630 vehichels.
Gremi: Departament da giustia, polizia e sanitad dal Grischun
Funtauna: rg Departament da giustia, polizia e sanitad