Las ovras electricas dal Mesauc (OEM) desistan da las concessiuns
per l'ovra d'accumulaziun stagiunala Curciusa. La regenza deplorescha la
decisiun da las OEM: suenter blers onns da stenta perdan las vischnancas
da concessiun, l'entira regiun ed il chantun in project impurtant dal
punct da vista da l'economia d'energia e da l'economia publica.
La procedura d'approvaziun per il project da concessiun Curciusa da
las OEM è pendenta dapi 1986. Suenter che la regenza grischuna ha
approvà il project per l'emprima giada l'onn 1990 suenter scleriments
fitg chars, han differentas organisaziuns da protecziun da l'ambient
fatg recurs al tribunal federal. Quel ha rinvià il cas a l'autoritad
chantunala per ina nova giudicaziun parziala a basa da la nova
legislaziun restrictiva davart la protecziun da las auas.
Er la segunda procedura d'approvaziun da la regenza da 1995 è
vegnida contestada da las organisaziuns da protecziun da l'ambient tar
il tribunal federal. Puspè hai dà ina procedura fich chara cun
correspundenza voluminusa ed argumentaziuns sco era ina inspecziun
oculara il november 1997. Dapi lura èsi stà quiet en connex cun questa
procedura avant il tribunal federal.
Sco consequenza dals custs creschents dal project e da la
malsegirtad augmentada davart ils svilups futurs sin il martgà
d'electricitad liberalisà da l'avegnir è la situaziun economica sa
midada drasticamain era per il project da Curciusa. Ils custs da
producziun sproporziunadamain auts d'actualmain ca. 18 raps per ura
kilowat ed il svilup futur malsegir dals pretschs d'electricitad han
chaschunà che las OEM desistan definitivamain dal project.
La regenza ha chapientscha per il fatg che las OEM, sin fundament da
las novas cundiziuns da basa,
taxeschan oz differentamain las ristgas colliadas cun ina
realisaziun da quest project. Ins sto constatar che la petenta ha en
mintga cas il dretg da desister da tut temp da las concessiuns
dumandadas.
Ord il punct da vista da la regenza èsi da deplorar che questa
renunzia è vegnida declerada avant ch'il tribunal federal è s'exprimì en
chaussa. Uschia restan numerusas dumondas senza resposta che fissan
stadas d'impurtanza decisiva per la realisaziun futura d'ovras
idraulicas, e quai betg sulettamain per las vischnancas, la regiun u il
chantun, mabain era per l'economia d'electricitad da l'entira Svizra
(applicaziun da las disposiziuns davart l'aua restanta tenor la lescha
davart la protecziun da las auas, impurtanza da la bilantscha positiva
d'energia, limitaziun da differents geners d'inventaris euv.).
Fitg deplorabla è la renunzia a quest project - ord vista da la
regenza ecologicamain cumpatibel - surtut dal punct da vista da
l'economia d'energia e da l'economia publica. Quest project avess
pussibilità la producziun d'energia d'auta qualitad per il consum
maximal oravant tut durant l'enviern. El avess er chaschunà
investiziuns considerablas en ina regiun cun economia flaivla per la
durada da blers onns. Las entradas che la communitad avess pudì spetgar
avessan er cuntanschì imports considerabels (prestaziuns unicas per las
vischnancas ed il chantun mintgamai 1.8 milliuns francs; prestaziuns
annualas per las vischnancas 1.7 milliuns francs e per il chantun 1.3
milliuns francs.
Ils retards da blers onns tras las differentas pussaivladads da
recurs e la lunga durada da procedura han mussà puspè ina giada
cleramain quant cumplitgadas ch'i sun surtut er las proceduras sin il
sectur da l'utilisaziun da las auas e quant temp ch'ellas pretendan.
Gremi: regenza
Funtauna: rg chanzlia chantunala dal Grischun