La regenza grischuna considerescha il studi ch'in team d'istorichers ha cumpilà sin incumbensa da la confederaziun davart il "Hilfswerk für die Kinder der Landstrasse" sco contribuziun da vaglia vid l'elavuraziun da la malgiustia commessa envers la populaziun vaganta en Svizra.
Il studi "Hilfswerk Kinder der Landstrasse" da Roger Sablonier, Walter Leimgruber e Thomas Meier è l'emprima elavuraziun scientifica da l'istorgia da questa "ovra d'agid" che tutgava tar la Pro Juventute. Tranter 1926 e 1973 eran passa 600 uffants da vagants svizzers (jens) vegnids pigliads davent da lur geniturs e per part plazzads en famiglias da tgira, per part en chasas d'uffants, chasas d'orfens u clinicas. Il studi explitgescha co la "ovra d'agid" ei vegnida creada e tge activitads ch'ella ha sviluppà, el s'occupa da las rollas che la Pro Juventute e la confederaziun han giugà e renviescha era sin la responsabladad dals chantuns e da las vischnancas per quai ch'è succedì. Ultra da quai cumpiglia el propostas e recumondaziuns per ulteriuras mesiras, co quest chapitel stgir da la politica sociala e la politica da provediment en Svizra duai vegnir elavurada.
La regenza s'exprima visavi la cussegliera federala Ruth Dreifuss davart quest studi ed explitgescha che ins stoppi sco conclusiun appellar a tut ils commembers da nossa societad da far bain attenziun da tut las furmas da discriminaziun. La populaziun stoppia vegnir sensibilisada per il contact cun minoritads e gruppas marginalas. En vista als vagants fissan adattads sco mesiras preventivas exposiziuns ambulantas, discussiuns dals vagants cun la populaziun domiciliada e scleriment en las scolas. En vista a las cundiziuns da vita actualas dals vagants indigens explitgescha la regenza che questas sajan satisfacentas e ch'ils vagants sajan er cuntents cun il dumber da las plazzas da segiurn stablas e transitorias che stattan a lur disposiziun. Per mauns da la fundaziun "Zukunft für Schweizer Fahrende" intimescha la regenza da s'engaschar dapli per ina repartiziun eguala da las plazzas da segiurn stablas e transitorias. Problems dettia quai oravant tut en il Mesauc cun ils vagants esters.
Il studi "Hilfswerk Kinder der Landstrasse" po vegnir cumprà per il pretsch da 15 francs tar la centrala federala da stampats e material (CFSM) , 3003 Berna, tel. 031-325 50 50, e-mail: verkauf.zivil@edmz.admin.ch.

Ord las vischnancas
La regenza approva il project integral da selvicultura Bergiaglia, per il qual èn budgettads custs da ca. 5.2 milliuns francs, e garantescha contribuziuns chantunalas en l'autezza da 659'000 francs. Il project vegn a durar sis onns ed intenziunescha da sanar ils guauds da protecziun en la Bergiaglia e da cumplettar las vias forestalas a Bondo e Vicosoprano.
La constituziun communala da S-chanf sco er la revisiun parziala da quella da Flem vegnan approvadas. Per differents projects da construcziun da vias en il chantun vegnan deliberads credits en l'autezza da ca. 1.5 milliuns francs.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun