Il zercladur ha la regenza deliberà la missiva ed il sboz per la
revisiun totala da l'ordinaziun davart la cassa da pensiun chantunala
dal Grischun per mauns dal cussegl grond. La cassa duai vegnir adattada
als svilups en la societad, l'economia ed en il mund da lavur. La
missiva exista uss en furma stampada.
En il center da la revisiun totala stat la midada dal plan da
prevenziun. Ins vul passar da la prioritad da prestaziuns a la prioritad
da contribuziuns. Entant ch'en la prioritad da prestaziuns dependa
l'autezza da las prestaziuns dal dumber d'onns ch'ins è participà a
l'assicuranza e da la davosa paja assicurada, èn la basa per calcular
las prestaziuns en la prioritad da contribuziuns ils dabuns da spargn
augmentads e la tariffa da conversiun. Cun midar la prioritad vegni
tegnì quint da la pretaisa per dapli flexibilitad e transparenza. La
prioritad da contribuziuns dat simplas soluziuns flexiblas per dumondas
che chaschunan difficultads en la prioritad da prestaziuns. Uschia pon
ins schliar ils suandants fatgs senza calculaziuns cumplexas
d'assicuranza:
-
midadas sin il sectur da paja pervia dals models moderns dal temp
da lavur,
- variaziuns dal pensum,
- pajas tenor prestaziun,
- entradas ed extradas da l'instituziun da prevenziun,
- promoziun da la proprietad d'abitaziuns cun meds dal provediment
professiunal, e
- disposiziuns da la cassa da pensiun tenor il nov dretg da divorzi.
Il cler concept da finanziaziun cun in process da furmaziun da
chapital enclegiantaivel è transparent per scadina persuna assicurada e
facil da chapir. En l'entira Svizra pon ins constatar in spustament vers
la prioritad da contribuziuns en las instituziuns da prevenziun. Bleras
instituziuns da dretg public ed er da dretg privat han gia fatg questa
midada e fan senz'auter experientschas positivas.
In punct da revisiun impurtant pertutga la surveglianza LPP. Da nov
duai ella vegnir excercitada dal departament da giustia, polizia e
sanitad (DGPS). Perquai ch'il DGPS è cumpetent gia oz per la
surveglianza da las instituziuns da prevenziun en il chantun e perquai
ch'el dispona uschia da las cugnuschentschas professiunalas necessarias,
è la midada da la surveglianza LPP natirala e logica. Il medem mument
pon ins rinforzar tras quai la surveglianza e la controlla e detretschar
las incumbensas dal departament da finanzas e militar en connex cun la
cassa da pensiun chantunala.
Da nov duain las contribuziuns vegnir graduadas en dependenza da la
vegliadetgna. I vegnan fixadas be anc contribuziuns totalas, da las
qualas la repartiziun tranter ils lavurants ed ils patruns è chaussa
dals partenaris socials. La paja assicurada vegn definida da nov. Sco
usità en autras instituziuns da prevenziun duai vegnir resguardada er la
13avla paja mensila per calcular la paja assicurada. Tenor il dretg en
vigur po ina persuna assicurada retrar be 20 pertschient da sia
prestaziun da vegliadetgna sco indemnisaziun en chapital. La regenza
propona d'augmentar questa opziun sin 50 pertschient.
Singulas decisiuns che vegnivan tratgas fin uss da la regenza duain
vegnir delegadas a la cumissiun administrativa. Quest organ paritetic
daventa uschia pli impurtant.
Igl è previs da suttametter pli tard in'autra missiva al cussegl
grond che preschenta l'autonomia da la cassa sco ch'ella era vegnida
planisada oriundamain e quai ensemen cun la proposta per finanziar il
deficit.
La cumissiun predeliberanta dal cussegl grond vegn a tractar la
revisiun totala da l'ordinaziun davart la cassa da pensiun il mais
avust, il cussegl grond probablamain en la sessiun d'october.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun