La regenza suttametta al cussegl grond in project per construir ina nova basa en la zona da mastergn Crappa Grossa a Glion. Per la construcziun nova vegni fatg quint cun custs da 14.86 milliuns francs. Il bajetg duai vegnir duvrà cuminaivlamain da l'uffizi districtual da construcziun bassa, dal post exteriur da controlla da l'uffizi per il traffic sin via e dal post exteriur da servetsch da l'uffizi forestal.
L'atun 1998 ha il chantun cumprà da la citad da Glion ina parcella da var 8'000 m2 en la zona da mastergn Crappa Grossa a l'ur vest da la citad. Sin quist terren duai vegnir construida ina nova basa. Actualmain è l'uffizi districtual da construcziun bassa 6 a Glion dividì sin differents edifizis: basa chantunala e biros prendids a fit. Specialmain la veglia basa è per part en in nausch stadi architectonic e na satisfa betg pli a las pretaisas. Plinavant èn ils andaments da gestiun difficils e nunrentabels.
Per trair a niz a moda raschunaivla las sinergias en connex cun il project da construcziun ch'è urgentamain necessari, duain vegnir plazzads en l'edifizi nov ultra da l'uffizi districtual da construcziun bassa er ils posts externs da l'uffizi per il traffic sin via e da l'uffizi forestal. Il project prevesa da construir in edifizi massiv en lenn che cumpiglia dus fin trais plauns ed ha la furma d'in angul. Las quotas d'investiziun per l'uffizi districtual da construcziun bassa da ca. 12.4 milliuns (83.4 pertschient) e da l'uffizi per il traffic sin via da ca. in milliun (6.8 pertschient) duain vegnir finanziads dal tuttafatg sur il quint da las vias, la quota da l'uffizi forestal da var 1.4 milliuns francs (9.8 pertschient) cun meds publics generals. La cumpetenza finanziala per la quota relativa a las vias da l'uffizi districtual da construcziun bassa sa chatta tar il cussegl grond, entant che las duas autras quotas da totalmain var 2.46 milliuns francs èn suttamessas al referendum facultativ.
Il cussegl grond vegn a tractar questa fatschenta probablamain durant la sessiun da november.

La gulivaziun da finanzas duai daventar pli efficazia
La regenza vul furmar la gulivaziun da finanzas tranter las vischnancas a moda anc pli efficazia. Ella propona perquai ina revisiun parziala da l'ordinaziun executiva dal cussegl grond davart la gulivaziun da finanzas intercommunala. Qua vul ins augmentar la quota dals meds senza intent specific. Quai è pussaivel be, sche las limitas existentas per la gulivaziun da la forza fiscala vegnan schluccadas.
La gulivaziun da la forza fiscala permetta d'avischinar la productivitad da vischnancas cun ina forza fiscala relativa (taglias per persuna) sut la media chantunala, a la media chantunala. Vi d'in exempel che parta d'ina media chantunala da 2'000 francs e d'ina forza fiscala da la vischnanca da 1'000 francs per persuna, po la gulivaziun da la forza fiscala vegnir explitgada sco suonda: La vischnanca obtegna in supplement da 600 francs per persuna ed augmenta cun quai sia forza fiscala sin 1'600 francs, in import che munta ad 80 pertschient da la media chantunala.
Tenor la regulaziun en vigur è questa gulivaziun dentant pussaivla mo per ils emprims 200 abitants ed abitantas. Cun la revisiun duai la limita vegnir dauzada uss sin 300 abitants ed abitantas. Quai permetta in augment da la prestaziun. Ina cumpletta abrogaziun da la limita d'abitants na fiss dentant betg pussaivla sin fundament dals meds finanzials limitadamain existents. Per vischnancas che fusiuneschan duai la regenza dentant obtegnair la pussaivladad d'abrogar la limita d'abitants durant in termin transitori.
Cun las mesiras previsas vegni tegnì quint dals basegns da gulivaziun midads da las vischnancas ch'èn sa spustads dal quint d'investiziuns al quint current. Perencunter duain tar tut las contribuziuns ad ovras publicas vegnir prendidas encunter perditas.

Consultaziuns a la confederaziun
Envers la confederaziun prenda la regenza posiziun pertutgant dus projects da consultaziun. Ella beneventa senza resalvas che la Svizra vul ratifitgar il statut da Roma da la curt penala internaziunala a Den Haag (NL). Quest statut è la basa legala per crear ina curt penala internaziunala permanenta che vegn ad esser cumpetenta per il giudicament da crims individuals spezialmain grevs (tranter auter genocid, crims cunter l'umanitad e crims da guerra). Actualmain exista mo ina curt penala ad hoc per Ex- Jugoslavia e Ruanda. La nova curt duai perencunter agir sin l'entir mund. Il statut creà la stad 1998 è vegnì sutsegnà fin uss da ca. 100 stadis, tranter quels er da la Svizra. El sto vegnir ratifitgà da 60 stadis, avant ch'el possia entrar en vigur ed avant che la curt possia entschaiver sia lavur. Sin plaun federal èsi previs da crear ina lescha federala davart la collavuraziun cun la curt penala internaziunala e da reveder correspundentamain il dretg penal.
Er il sboz per ina midada da l'ordinaziun davart l'assicuranza da dischoccupads vegn approvà. Questa midada cumpiglia essenzialmain las suandantas innovaziuns:
- La participaziun finanziala dals chantuns a las mesiras sin il martgà da lavur vegn reglada e las disposiziuns davart la repartiziun da la purschida minimala vegn abrogada.
- La midada da la responsabladad dals purtaders da la chascha e dal chantun ha per consequenza che la taglia militara vegn reglada. Plinavant duain vegnir introducidas ina bunificaziun da la ristga da responsabladad ed ina assicuranza per gronds donns.
- Ils custs imputabels dals posts executivs chantunals vegnan reglads da nov. Ultra da quai vegnan introducidas las prescripziuns per las cunvegnas da prestaziun cun quests posts executivs e cun las cassas per ils dischoccupads.
La regenza accentuescha puspè che blers chantuns han giavischà, cun sutsegnar l'incarica da prestaziun CRIL, da passar a la budgetaziun pauschala. Quest giavisch è senz'auter da realisar.

Da las vischnancas
Il project da construcziun per sanar e furmar da nov ils conturns dal stabiliment da scola Herold a Cuira vegn approvà. Als custs imputabels da var 120'000 francs vegnan empermessas contribuziuns chantunalas da 10 pertschient.
Il project per la construcziun d'in giratori en furma d'ellipsa a la cruschada "Falknis" entaifer il vitg dad Igis vegn approvà. Als custs imputabels da var 348'000 francs vegnan empermessas contribuziuns chantunalas da 15 pertschient.
La planisaziun d'utilisaziun concernent l'indriz da far naiv Jakobshorn a Tavau vegn approvada cun resalvas. Ina revisiun parziala da la planisaziun locala da Guarda ed ina revisiun da la lescha da taglia da St. Antönien vegnan approvadas.

Il nov secretari da departament en il DIEP
Sco successur da Christian Boner che daventa president da la citad da Cuira, ha la regenza tschernì Walter Schlegel sco secretari dal departament da l'intern e da l'economia publica. Schlegel è naschì l'onn 1962, è burgais da Buchs SG ed è domicilià a Trimmis. El è maridà e bab da dus uffants pitschens. Walter Schlegel ha frequentà la scola primara, secundara e chantunala a Cuira ed ha terminà 1990 ses studi da giurisprudenza a l'universitad da Turitg. Silsuenter ha el fatg in praticum d'advocat tar l'inspecturat dal register funsil ed en in biro d'advocatura a Cuira. Dapi 1992 è el vicedirectur da l'uffizi da polizia.

Gremi: regenza
Funtauna: rg chanzlia chantunala dal Grischun