Zum Seiteninhalt

La cumissiun predeliberanta dal cussegl grond approva l'applicaziun dal rumantsch grischun per ils documents da votaziun chantunals e per il cudesch da dretg grischun

Ils 30 d'october 2000 ha ina cumissiun predeliberanta dal cussegl grond tractà la revisiun parziala da la lescha davart il diever dals dretgs politics en il chantun Grischun sco er la revisiun parziala da l'ordinaziun dal cussegl grond davart l'ediziun d'in nov cudesch da dretg. La cumissiun ha discutà questas duas revisiuns parzialas sut il presidi da deputà Placi Berther, Sedrun, ed en preschientscha dal schef dal departament d'educaziun, cultura e protecziun da l'ambient, cusseglier guvernativ Claudio Lardi e ses collavuraturs.
L'intent da las duas revisiuns parzialas è d'applitgar en l'avegnir per ils documents da votaziun chantunals sco er per la collecziun sistematica dal dretg grischun mo pli la lingua da scrittira unifitgada rumantsch grischun enstagl dals idoms sursilvan e ladin. Quai è in ulteriur pass vers la finamira da duvrar il rumantsch grischun sco lingua uffiziala oravant tut per texts che sa drizzan a l'entira populaziun rumantscha. La cumissiun predeliberanta dal cussegl grond e la regenza èn da l'avis che l'acceptanza creschenta da la lingua da scrittira unifitgada tar la populaziun rumantscha giustifitgeschia ina tala applicaziun dal rumantsch grischun. La finamira da las revisiuns planisadas è da rinforzar il rumantsch sco lingua uffiziala dal chantun. Cun introducir il rumantsch grischun en ils secturs numnads nun èsi pli necessari da far duas translaziuns dal medem text. Las capacitads che vegnan libras tras quai pussibiliteschan d'amplifitgar l'applicaziun dal rumantsch sin il sectur uffizial. Ultra da quai duain las revisiuns permetter da crear ina lingua giuridic-administrativa unifurma sco er da furnir ils documents da votaziun rumantschs a tut ils territoris linguistics rumantschs. Sche las revisiuns parzialas vegnan approvadas, vegn il cudesch da dretg grischun a star a disposiziun en rumantsch grischun en furma stampada ed electronica la fin da l'onn 2004.
La cumissiun ha decidì unanimamain d'acceptar il project e recumonda al cussegl grond da tractar quel en la sessiun da november. Il conclus dal cussegl grond concernent la revisiun da la lescha davart il diever dals dretgs politics vegn suttamess a la votaziun dal pievel.

Per infurmaziuns:
Placi Berther, president da la cumissiun predeliberanta, Tgès'Alva, 7188 Sedrun
Tel. f. 081 949 16 44, p. 081 949 20 30

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond