Pertutgant la votaziun chantunala dals 21 da matg 2000 concernent la
lescha davart ils automats da gieu ed ils manaschis da gieus
Il mars 1993 ha il pievel svizzer acceptà cun ina clera maioritad
ina midada da la constituziun federala, abrogà il scumond da las bancas
da gieu e pussibilità uschia ch'en Svizra dastgan vegnir installads en
avegnir automats da gieus da fortuna en ils casinos e las salas da gieu.
Il 1. d'avrigl 2000 è uss ida en vigur la nova lescha federala davart
ils gieus da fortuna e las bancas da gieu. Questa lescha ha d'ina vart
l'intent da procurar per entradas en favur da la confederaziun e dals
chantuns e da l'autra vart da promover il turissem. Las entradas
fiscalas che la confederaziun incassa da las bancas da gieu cun ina
concessiun A vegnan duvradas per cuvrir la contribuziun federala a la
AVS. Las entradas fiscalas incassadas da las bancas da gieu cun ina
concessiun B pon vegnir repartidas tranter la confederaziun ed ils
chantuns. Sch'il chantun creescha ina basa legala per imponer taglias a
las salas da gieu, alur reducescha la confederaziun sia taglia sin las
bancas da gieu cun ina concessiun B per maximal 40 pertschient en favur
dals chantuns. Quai vul dir che las singulas bancas da gieu en il
chantun Grischun na vegnan betg engrevgiadas ulteriurmain tras l'incasso
d'ina taglia chantunala. Al chantun èsi dentant pussaivel da duvrar 40
pertschient da la taglia sin las bancas da gieu dal Grischun per intents
chantunals be, sch'el relascha ina lescha. Ils 21 da matg 2000 votain
nus pia davart ina participaziun dal chantun vi da las entradas da la
taglia sin las bancas da gieu.
Ils puncts principals da la lescha
Ultra da furnir la basa legala per incassar ina taglia chantunala
reunescha la lescha plinavant tut las disposiziuns chantunalas
pertutgant ils gieus en in decret. Las vischnancas obtegnan cumpetenzas
supplementaras. Ellas pon decider, sch'ellas vulan suttametter ils
locals da gieu cun automats da gieus da divertiment a l'obligaziun da
dumandar ina permissiun u betg.
Il scumond d'installar automats da gieus d'inschign ordaifer las
salas da gieu, che vala en il chantun, duai vegnir mantegnì. Quest
scumond na vegn er betg midà dal fatg, che la regenza po permetter en il
futur, ultra da las bancas da gieu cun ina concessiun federala, er salas
da gieu chantunalas, e quai tenor ils criteris da fin uss. En questas
salas dastgan vegnir offrids be gieus d'inschign. L'obligaziun existenta
da dumandar in permiss per automats da gieus da divertiment na vegn er
betg midada.
Ina decisiun per rinorzar las finanzas dal chantun
La lescha davart ils automats da gieu ed ils manaschis da gieus vegn
beneventada cleramain dal cussegl grond e da la regenza e merita in bun
sustegn. L'incasso da la taglia chantunala sin las bancas da gieu è
d'interess per tut las burgaisas ed ils burgais. En il num da la regenza
e dal cussegl grond supplitgesch jau Vus d'acceptar il project. Cun in
gea per la lescha chantunala davart ils automats da gieu ed ils
manaschis da gieus obtegnin nus ina regulaziun politicamain favuraivla
da las finanzas dals fatgs da gieu e procurain per ulteriuras entradas
en favur da noss chantun, senza stuair engrevgiar ulteriurmain las
bancas da gieu en il chantun.
Cusseglier guvernativ dr. Peter Aliesch
Gremi: president da la regenza dal Grischun
Funtauna: rg president da la regenza dal Grischun