La situaziun da l'economia grischuna forestala e da laina n'è betg cuntentaivla. La quantitad da laina che crescha suenter en il chantun na vegn betg utilisada dal tuttafatg e vegn absorbada be parzialmain dals manaschis ch'elavuran laina. Ils potenzials per augmentar la cumpetitivitad e pia per in diever supplementar dal lain grischun èn dentant avantmaun e vegnan renconuschids. Cun "LAIN futuro" ha la federaziun da tetg da l'economia grischuna forestala e da laina elavurà ina strategia pratica che vegn ad augmentar la valur ecologica, economica e sociala.
Be circa dus terzs dal lain che crescha suenter en il chantun vegnan utilisads, var in terz ha chaschunà fin uss in'ulteriur augment da las provisiuns. Il motiv principal è in'economia da laina sutdotada en proporziun cun la quantitad da laina tratga a niz. Consequentamain sa reducescha marcantamain l'affluenza da laina per lung da la chadaina da laina. In pèr flaivlezzas impurtantas da l'economia grischuna forestala e da laina èn decisivas per quest resultat. En emprima lingia èn quai ina communicaziun pauc expressiva da la chadaina da laina anoravers sco er deficits d'infurmaziun e problems d'intersecziun tranter ils singuls commembers da la chadaina da producziun da laina. Ils singuls manaschis sco er la chadaina da laina per propi na fan strusch marketing per lur products e per lur prestaziuns da servetsch. Plinavant resultan deficits da manaschi tar ina part dals manaschis da la branscha.

Las finamiras da "LAIN futuro"
Ina cultivaziun dal guaud persistenta premetta dentant in'economia da laina intacta ed efficazia cun in'utilisaziun forestala effizienta. Il guaud è bun d'ademplir bain sia funcziun da protecziun e da bainstar, be sch'il lain or dals guauds grischuns vegn er duvrà. Potenzials considerabels per rinforzar la cumpetitivitad, per meglierar la productivitad e las prestaziuns da servetsch u per optimar las cundiziuns generalas en l'economia forestala e da laina èn avantmaun e vegnan renconuschids.
Cun il project "LAIN futuro" duain ins cuntanscher las suandantas finamiras principalas:
- augmentar marcantamain la valur agiuntada en l'economia forestala e da laina
- augmentar il diever dal lain grischun per 10 pertschient fin l'onn 2004 e per almain 30 pertschient fin l'onn 2010
- agumentar il consum entaifer il chantun per 25 pertschient fin l'onn 2004 e per almain 75 pertschient fin l'onn 2010
Ina strategia cun tschintg pitgas
Las tschintg direcziuns strategicas principalas dattan la prioritad a las finamiras: 1. La chadaina grischuna da laina duai pudair porscher buns products cun in'auta qualitad da prestaziun a ses clients.
2. La chadaina da producziun da laina duai fusiunar ad ina ferma chadaina da laina.
3. Activitads efficazias da marketing e da communicaziun duain crear bainvuglientscha per il lain e meglierar la prontezza dals clients principals da duvrar dapli lain grischun.
4. Las cundiziuns generalas per manaschis da l'economia forestala e da laina duain vegnir meglieradas.
5. Ina plattafurma organisatoria ed infrastructurala solida duai esser la premissa per realisar cun success questas mesiras.

Questas direcziuns strategicas vegnan concretisadas cun 43 mesiras e 12 projects principals. Ils projects principals èn pinads, uschia ch'ins als po entschaiver prest.

La realisaziun è pronta
Cun ina clera repartiziun da las incumbensas vegnan creadas bunas premissas per ina realisaziun cun success da "LAIN futuro". Ultra da l'organisaziun da tetg LAIN grischun obtegnan er las singulas federaziuns ina gronda impurtanza. La realisaziun da "LAIN grischun" po vegnir garantida finanzialmain ad interim per ils emprims trais onns da gestiun. Suenter trais onns vegn fatg in inventari selvicultural davart ils singuls progress.

"LAIN futuro" è vegnì elavurà da la branscha
Gia la procedura d'elavuraziun è vegnida fatga uschia ch'igl èn resultadas fitg bunas premissas per ina realisaziun cun success. Sut la direcziun dal project da l'interpresa da cussegliaziun BHP-Brugger e partenaris SA è "LAIN futuro" vegnì elavurà en ina gruppa directiva. La gruppa directiva sa cumpona da represchentants da tut las federaziuns parzialas da LAIN grischun ed è sa reunida tschintg giadas per workshops intensivs durant la perioda dal schaner fin il matg 2001. Lavurs supplementaras per concretisar il project èn vegnidas fatgas en otg gruppas da lavur separadas cun la participaziun d'ulteriurs spezialists dal chantun Grischun.
"HOLZ Graubünden, LAIN grischun, LEGNO grigione" è la fusiun da tut las federaziuns, interpresas, instituziuns e persunalitads interessadas al lain grischun. Commembers èn:
- federaziun grischuna d'industria da laina, FGIL
- SELVA, federaziun forestala dal Grischun
- construcziuns en lain svizra, secziun grischun
- federaziun grischuna dals maisters scrinaris e fabricants da mobiglia, FGMF
- federaziun grischuna dals impressaris forestals, FGIF
- federaziun grischuna dals inschegners forestals independents, FOGRI
- chantun Grischun (uffizi forestal dal Grischun)
- commembers singuls
La finamira communabla è l'augment da la valur agiuntada en la chadaina da laina e parallelamain il rinforz da plirs dievers da la laina grischuna. Questa finamira vegn cuntanschida tras ina gronda cumpetitivitad dals manaschis, ina buna collavuraziun dals acturs participads sco er ina commerzialisaziun efficazia da la resursa lain e da ses products. LAIN grischun è in post da consultaziun cumpetent per dumondas da laina en il chantun e drizza sias activitads consequentamain tenor las finamiras.
Gremi: LAIN grischun
Funtauna: rg LAIN grischun