Navigation

Inhaltsbereich

  • Erste Mitteilung
  • Neuen Beitrag einfügen
Il departament d'educaziun, cultura e protecziun da l'ambient lantscha ina concurrenza per tut las scolaras ed ils scolars dal chantun Grischun. Las meglras ideas e/u acziuns sin il champ da la protecziun da l'ambient e da la natira survegnan in premi en furma d'ina contribuziun da 1'000 francs per la cassa da viadi.
Vus vegnis as dumandar tge che protecziun da l'ambient ha da far cun scola? Ozendi ston ins cumbinar pliras disciplinas, in pensar cumbinatoric è dumandà! Ma er l'ambient e la natira dovran raits. Spazis da viver per plantas ed animals smanatschads ston vegnir colliads cun ina rait. Igl è er impurtant da far ina punt tranter l'uman senza temp, causa ses numerus impegns e termins, e l'ambient che dovra l'uman sco partenari e promotur. L'occupaziun dals giuvenils cun projects ecologics na promova betg mo la conscienza per l'ambient, mabain dat er in cuntegn concret e fisic a la noziun progressiva da la persistenza.

Avair plaschair da l'ambient e da la natira
Igl è mes giavisch ch'ins s'occupeschia en scola da dumondas da l'ambient. E quai libramain, q.v.d. a moda creativa, cun agnas ideas, cuntents. I duai far plaschair! Ed ins duai rapportar da quai faschond effect.
Ma per mai èsi er ina schanza, perquai che tant la responsabladad per la problematica da l'ambient sco er la politica da scola pertutgan mes departament.

Concurrenza per tut las classas da scola en il chantun
Nus avain tschernì la via en furma d'ina concurrenza cun fitg paucas reglas dal gieu. Ins sto be
- avair ina buna idea e far ina buna acziun sin il champ da la protecziun da l'ambient, da la cuntrada u da la natira, e
- documentar questa idea u buna acziun ed inoltrar la documentaziun a l'UPA,
e gia èn ins da la partida.
Per questa acziun essan nus vegnids inspirads betg il davos tras la 5./6. classa da magister Pius Bergamin a Panaduz, ch'ha represchentà l'onn passà la Svizra al di mundial da l'aua e da la giuventetgna en Alsazia. Là han els mussà ina prestaziun excellenta e represchentà la Svizra cun dignitad realisond lur atgna idea da construir ina "senda instructiva per lung d'in flum destinada a velocipedists giuvens". Talas acziuns ed er autras na vuli betg mo a Panaduz, mabain en l'entir chantun. Nossas spezialistas e noss spezialists en l'uffizi per l'ambient, en l'uffizi per la natira e la cuntrada, en il museum grischun da la natira ed er en auters uffizis as sustegnan cun pled e fatg e pon gidar a realisar Vossa idea cun ina pitschna contribuziun.
Perquai engraziel jau a tut las classas da scola ch'impundan ina pitschna part da lur custaivel temp per la natira e l'ambient en il rom da questa concurrenza.
Tut las scolas dal Grischun survegnan proximamain prospects e material.
Claudio Lardi, cusseglier guvernativ
schef dal departament d'educaziun, cultura e protecziun da l'ambient

Gremi: departament d'educaziun, cultura e protecziun da l'ambient dal Grischun
Funtauna: rg departament d'educaziun, cultura e protecziun da l'ambient dal Grischun
Neuer Artikel