En il Grischun èsi fitg difficil da chattar persunal da tgira qualifitgà e cun experientscha. Ils problems da recrutar in tal persunal èn s'augmentads ferm dapi 1999. Totalmain èn vacantas var 120 plazzas en ils ospitals e las clinicas, en las chasas da tgira e las partiziuns da tgira sco er en il sectur da spitex. Questa situaziun dastgass anc s'intensivar proximamain. Las cumparegliaziuns annunziadas pli baud da la regenza cun auters chantuns da la Svizra orientala han mussà ussa che las pajas en il Grischun sa chattan per part sut la media da la Svizra orientala. Sco mesira immediata introducescha la regenza davent dal fanadur 2001 in uschenumnà supplement en connex cun il martgà da lavur per il persunal da tgira. Quel munta tut tenor la funcziun da 1'200 a 3'600 francs per onn. La mesadad da l'onn proxim vegn examinada da nov la situaziun ed i vegn decidì, sch'ins vul cuntnuar u midar il supplement. Il supplement en connex cun il martgà da lavur chaschuna custs supplementars da var 4.7 milliuns francs. Da quels fan part anc ils custs per augmentar ils salaris da las scolaras e dals scolars sco er ils daners da las staziuns.

Gremi: Regenza
Funtauna: rg Chanzlia chantunala dal Grischun