Las abitantas ed ils abitants da las chasas da vegls e da tgira en il chantun Grischun dastgan avair la garanzia ch'els vegnan tractads a moda correcta dal punct da vista uman, professiunal ed a moda sensibla. Sche las collavuraturas ed ils collavuraturs d'ina chasa constateschan mancanzas correspundentas, ston els comunitgar lur constataziuns per la via uffiziala. Sche la chasa na resguarda betg la critica giustifitgada che vegn fatga en favur dals pazients, duai la critica pudair vegnir exprimida ordaifer senza che las persunas che la manifesteschan hajan supportar consequenzas al plaz da lavur. Ina critica constructiva na dastga betg represchentar in criteri negativ per in engaschament en ina chasa da vegls e da tgira.
Il departament da giustia, polizia e sanitad dal chantun Grischun renconuscha en sia qualitad sco post suprem da surveglianza da las chasas dal chantun che las tgirunzas Ursula Quirin, Lotti Riesch, Irene Oberer, Marie-Theres Tschenett-Keiser, Beatrice Pinchera e Priska Meier-Gotsch han gidà cun lur intervenziuns en il decurs dals onns passads ad illustrar il tractament da las abitantas ed ils abitants en la chasa da vegls e da tgira Promulins a Samedan ed han chaschunà tras quai essenzialmain las meglieraziuns succedidas. En consequenza da lur intervenziuns è vegnida examinada e modifitgada la structura directiva e d'organisaziun da la chasa da vegls e da tgira Promulins.
Il departament da giustia, polizia e sanitad manifestescha sia speranza che las dunnas menziunadas na stoppian betg supportar consequenzas negativas pervia da lur intervenziuns en il futur. Il departament exprima ses dischplaschair a las dunnas davart las consequenzas ch'ellas han gì da purtar suenter ch'ellas han obtegnì la desditga.
Tenor la revisiun parziala da la lescha davart la tgira da malsauns acceptada a la votaziun chantunala dals 4 da mars 2001 ston numnar en il futur tut las chasas da vegls e da tgira in mediatur independent. Da quest post da consultaziun nunbirocratic spera il departament d'obtegnair impuls per meglierar la tgira e l'ssistenza en las chasas da vegls e da tgira.

Gremi: departament da giustia, polizia e sanitad dal Grischun
Funtauna: rg departament da giustia, polizia e sanitad dal Grischun