La regenza suttametta al cussegl grond ina cuntraproposta pertutgant
l'iniziativa per premias supportablas da la cassa da malsauns sco er ina
revisiun parziala da la lescha davart l'assicuranza da malsauns e la
reducziun da las premias.
La regenza è da la medema opiniun sco las iniziantas ed ils
iniziants ch'en l'avegnir èn necessaris ulteriurs meds per la reducziun
da las premias. L'augment necessari dals meds e qua surtut dependent dal
futur augment da las premias e da la clav da repartiziun per attribuir
las contribuziuns federalas als chantuns. La regenza è pia fermamain
persvadida ch'il grad d'exauriziun saja ina norma da mesiraziun e da
direcziun nunadequata per mantegnair en ina dimensiun supportabla ils
custs da las premias da las chasadas.
Cun la prescripziun d'in tschert grad d'exauriziun dals meds
federals, sco ch'il comité d'inziativa pretenda, n'ha la populaziun betg
la garanzia che persunas en relaziuns economicas modestas survegnian
suffizientamain contribuziuns per reducir las premias. L'iniziativa na
prevesa numnadamain naginas limitas da grevezza per chasadas.
La cuntraproposta prevesa da fixar en la lescha la part maximala da
las entradas imputablas d'ina chasada per pajar las premias da la cassa
da malsauns. Decisiv per la dimensiun da la reducziun da las premias èsi
pia quants pertschients da las entradas d'ina chasada che pon vegnir
definids sco supportabels per pajar las premias da la cassa da malsauns.
La resalva persunala duai muntar per las entradas imputablas fin 10'000
francs maximalmain tschintg pertschient ed augmentar partind da quels
per mintga ulteriura categoria d'entradas da 10'000 francs per
maximalmain in pertschient fin maximalmain diesch pertschient.
L'autezza da las resalvas persunalas furma uschia la norma da
mesiraziun decisiva per la direcziun socialpolitica da la reducziun
individuala da las premias (RIP). La differenza tranter l'autezza da las
premias e la resalva persunala dattan pia il volumen necessari RIP e pia
er il grad d'exauriziun necessari da la contribuziun federala. Quella
s'augmentass sche la cuntraproposta vegniss acceptada per l'onn 2003
probablamain sin 66 pertschient, per l'onn 2004 sin 69 pertschient e per
l'onn 2006 sin 75 pertschient (oz 55 pertschient).
La cuntraproposta sa basa sin ponderaziuns confurmas al basegn. Cun
acceptar la cuntraproposta han persunas en relaziuns economicas modestas
la garanzia che la grevezza per lur chasada na s'augmenta betg
annualmain, perquai che la cuntraproposta resguarda er il svilup da las
premias.
Ils puncts principals da la part da la revisiun da la LARP
independenta da l'iniziativa èn la realisaziun da las midadas da la LAM
dals 24 da mars e dals 6 d'october 2000, l'introducziun da la
surprendida cumpletta da las premias per persunas cun in sustegn public
u cun contribuziuns da maternitad e l'introducziun da las participaziuns
da las vischnancas per reducir las premias ed evitar uschia in
spustament da las grevezzas da las vischnancas al chantun. Ina tala
participaziun enconuschan er numerus auters chantuns.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun