Il chantun Grischun ha dapi l'entschatta da fanadur 2001 in medi
directiv d'urgenza. Il departament da giustia, polizia e sanitad ha
elegì Peter Adrian Herzog, domicilià a Samedan, sco medi directiv
d'urgenza dal chantun Grischun.
Avant dus onns ha la Regenza mess en vigur il concept da salvament
dal Grischun. Ina part impurtanta da quest concept furma l'acziun d'in
medi directiv d'urgenza tar "gronds eveniments".
La sort da pazients d'urgenza sa decida savens gia al lieu da
l'accident e sin il transport en l'ospital.
I vegn aspirà perquai oz, gia en questa fasa, da savair prestar agid
cumpetent. Tar l'entrada d'in grond cas da donn cun dapli che quatter
fin tschintg blessads coordinescha e surveglia il medi directiv
d'urgenza las mesiras medicinalas directamain al lieu da l'eveniment. El
decida tgi che dat agid medicinal a tgi. El garantescha er ch'ils
blessads vegnian transportads al dretg ospital. Latiers lavura el
stretgamain ensemen cun las persunas da cader da la polizia e dals
pumpiers.
Il servetsch da salvament n'ha betg mo da garantir il provediment
dal servetsch sanitar en cas da "pitschens"eveniments. Tar cas da donns
cun plirs blessads, sco per exempel tar lavinas u bovas, accidents da
chemia u schizunt tar catastrofas pli grondas, pon acziuns dal servetsch
sanitar daventar necessarias dapertut en noss chantun. Dumagnar tals cas
pretenda structuras d'organisaziun concepidas per quest intent. Per
optimar questas structuras d'organisaziun chantunalas vegnan duvradas,
en collavuraziun cun ils partenaris participads, las enconuschientschas
professiunalas dal medi directiv d'urgenza.
Peter Adrian Herzog vegn l'emprim a stgaffir in servetsch da pichet
tras in medi directiv d'urgenza durant 24 uras. Quai vegn a succeder en
collavuraziun cun ils medis d'urgenza en ils ospitals sco er cun il clom
d'agid sanitar 144. Dasperas vegn el era ad elavurar in concept davart
la garanzia dal provediment dal servetsch sanitar tar eveniments gronds.
Peter Adrian Herzog è medi spezialisà FMH per anestesiologia sco er
medi d'urgenza (SSMUS). Sia scolaziun sco medi d'urgenza ha el frequentà
en l'Austria, perquai ch'ils curs confurms na vegnan betg anc purschids
en Svizra. Peter Adrian Herzog vegn ad ademplir sias lavurs tar il
chantun en in pensum a temp parzial. Dasperas resta el activ sco medi
spezialist, per na perder la relaziun cun la pratica.
Gremi: departament da giustia, polizia e sanitad dal Grischun
Funtauna: rg uffizi da sanadad