Tenor l'avis da la regenza grischuna è il concept da l'Armada XXI adattà. Ella dumonda dentant da rinforzar las truppas da muntogna per pudair garantir la protecziun da las trais transversalas da las Alps. En quest reguard s'exprima ella davart il model da l'armada e la revisiun da la legislaziun militara.
Envers cusseglier federal Samuel Schmid s'exprima la regenza davart il model da l'armada e la revisiun da la legislaziun militara. Il model da l'armada (MA) mussa cun tge structuras e meds che l'armada svizra duai ademplir sia missiun en quest decenni. El furma il liom tranter il rapport da la politica da segirezza 2000 e la revisiun parziala da la lescha militara per l'Armada XXI. La lescha militara duai spustar e concretisar il MA. La regenza è er da l'avis, che la situaziun da la politica da segirezza, las structuras antiguadas, las mancanzas concepziunalas en la scolaziun ed en las acziuns da l'armada sco era in conturn economic e social midà, dumandian ina refurma da l'armada. Il concept Armada XXI è tenor l'opiniun da la regenza grischuna adattà. La regenza fa cun insistenza la dumonda da rinforzar las truppas da muntogna per pudair garantir la protecziun da las trais transversalas da las Alps. Dal reminent s'exprima la regenza cun insistenza per mantegnair er en l'Armada XXI ina part reducida da furmaziuns da train e da manar in center da cumpetenza per l'instrucziun. La finala vegn er la revisiun da la lescha dal servetsch civil sustegnida. Il servetsch civil na duai en l'avegnir betg cuzzar pli 1.5 gia dapli ch'il servetsch militar betg prestà, mabain be pli 1.3 gia dapli.

Consultaziuns a la confederaziun
La revisiun totala da la lescha da dazi, la quala sa basa sin il dretg da duana da l'Uniun europeica, vegn en general approvada. Er senza adesiun a la Communitad europeica è la Svizra, sco pajais amez il martgà intern da l'UE, per l'interess da l'economia e dal turissem, dependenta da tractar il traffic da persunas e da rauba giuridicamain sco l'UE.

Contribuziuns culturalas
I vegn conderschì contribuziuns e garanzias da deficit en la summa totala da 790'000 francs als suandants projects ed a las suandantas organisaziuns:
- acquistar la pli impurtanta scuverta d'aur da muntogna en Svizra (Sumvitg, Surselva) e recepir questa en ina fundaziun collecziun museum da la natira dal Grischun, la quala è da fundar da nov,
- publicaziun ed inventarisaziun d'ovras d'art en plazzas publicas en il chantun Grischun tras la cuminanza d'interess per l'art en plazzas publicas,
- project da perscrutaziun "dunnas en il Grischun. Perscrutaziuns davart l'istorgia da las dunnas e da las schlattainas en il 19. e 20. tschientaner en il Grischun" tras l'archiv per la cultura da las dunnas dal Grischun,
- contribuziun da stipendis a la societad dals picturs, sculpturs ed architects svizzers "visarte" secziun dal Grischun per artists che vivan e dovran l'atelier a Paris,
- contribuziun annuala da l'associaziun chantunala da chant dal Grischun,
- emnas da chant per chors da scolars e giuvenils,
- contribuziun al giubileum da 100 onns a la federaziun grischuna da musica, per promover vinavant ils fatgs da la musica instrumentala en Grischun, e
- lavurs da sanaziun finalas vid la terza auzada da la scola svizra a Milaun.

Guauds da ruvers en il Scanvetg vegnan mantegnids
Sin il territori da las vischnancas da Maladers e Castiel datti guauds da ruvers, ch'èn unics da lur sort en la regiun e da gronda valur ecologica. Per mantegnair els, approva la regenza il project parzial, guaud la ruvers Castiel. I vegn quintà cun expensas da 438'000 francs sur in spazi da temp da diesch onns. Il chantun garantescha contribuziuns da 27 pertschient en ratas annualas.

Agid umanitar
A la Crusch Cotschna Svizra (CCS) vegn pajà ina contribuziun da 100'000 francs en favur da l'acziun d'agid per las unfrendas dal terratrembel a Peru.

Da regiuns e vischnancas
La nova constituziun dal circul d'Alvaschagn vegn approvada cun exepziun d'in artitgel, quella dal circul da Maiavilla vegn approvada.
Las constituziuns communalas da Tavau e La Punt Chamues-ch e la lescha da taglia da Sursaissa vegnan approvadas.
Per differents projects da construcziun da vias en il chantun vegnan mess a disposiziun credits cun ina summa totala da bunamain 7.3 milliuns francs (lavurs da construcziun e da cuvrida vi da l'A13 sper Nufenen, sanaziun galarias Bagn da Ferrera sper la via d'Avras, amplificaziun via da Furna, lavurs da cuvrida en vischinanza da la rundella Falknis a Landquart, sviaments da Claustra e da Flem sco er lavurs da construcziun vi da la punt da Tscher sper la via da Samignun).

Persunal
- Gianfranco Albertini, naschì 1963, da Mesauc, domicilià a Cuira, daventa schef da la polizia criminala tar la polizia chantunala cun effect a partir il pli tard dal november 2001.
- Antonio Preziuso, naschì 1959, da l'Italia, domicilià a Cuira, daventa cussegliader da scola e d'educaziun tar il servetsch psicologic da scola per las regiuns da Landquart e Casti. El cumenza ses uffizi l'entschatta d'october.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun