Ils 22 d'avust 2001 po il cusseglier guvernativ Claudio Lardi surdar
a 43 magistras e ma-gisters lur attest da qualificaziun che legitimescha
els d'instruir il talian resp. l'englais sin il stgalim superiur da la
scola populara e quai a chaschun d'ina festivitad finala en la scola
chantunala a Cuira.
L'october 2000 ha il cussegl grond revedì l'ordinaziun executiva tar
la lescha da scola e fixà in nov canon da roms per il stgalim superiur
da la scola populara. L'englais duai vegnir purschì sco rom obligatori
per tut las scolaras e tut ils scolars. Per garantir la cuntinuitad en
la purschida da linguas durant l'entir temp da scola primara vegn
agiuntà il talian sco rom obligatori en la part tudestga dal chantun
Grischun.
Areguard la situaziun nova èn da qualifitgar ils magisters da la
scola reala e secundara sin il champ da las linguas estras. Scolaziuns
correspundentas han lieu dapi la primavaira 2000 a Cuira. Ils curs
correspundan a quels che vegnan purschids a l'universitad da Turitg.
Professer Walter Hohl, ante-riur directur da la scolaziun per magisters
secundars e magisters spezialisads a l'universitad da Turitg è il
manader dal curs.
In curs cumpiglia trais semesters. Ils magisters vegnan scolads en
la cumpetenza linguistica, però er en la didactica da las linguas
estras, en la litteratura ed en la cultura. Dasper ils cuntegns dal curs
che vegnan purschids mintgamai las sondas en furma da leczius han lieu
emnas cumpactas da linguistica e lit-teratura. Duas dimoras per
emprender linguas estras cun in program da curs intensiv vegnan
ralisadas en ils territoris linguistics correspundents en l'Engalterra
resp. en l'Italia.
La scolaziun cumplementara a la professiun premetta in grond
engaschi ed ina gronda lavur dals magisters. Da l'autra vart porscha
ella dentant er in enritgiment d'emprender profundadamain ina lingua
estra e da sa fatschentar cun in'instrucziun moderna da lingua estra.
L'emprim curs è vegnì terminà la fin da zercladur 2001. Enfin l'onn 2004
han lieu en tut quatter curs.
Gremi: departament d'educaziun, cultura e protecziun da l'ambient
dal Grischun
Funtauna: rg uffizi per las scolas popularas e las scolinas