Suenter ch'il luf bergiagliot ha stgarpà dapi la primavaira passada 50 nursas, ha la regenza grischuna concludì da permetter da laschar schluppettar il luf.
L'uffizi federal d'ambient, guaud e cuntrada (UFAGC) ch'è responsabel per il concept "luf svizzer" ha previs da permetter da laschar schluppettar ils lufs immigrants en cas ch'els chaschunan donns insupportabels vi dal muvel manidel. Ils chantuns èn responsabels per dar la permissiun da schluppettar e per la realisar. Questa po dentant mo vegnir dada sche las cundiziuns da basa numnadas en il concept da l'UFAGC vegnan ademplidas. Areguard ils donns vi dal muvel manidel ha l'UFAGC relaschà directivas cleras. Sch'in luf mazza durant il temp da l'alpegiada dapli che 50 animals da niz sin pastgiras d'alp pon ils chantuns responsabels permetter da laschar schluppettar quel.
Dapi l'avrigl passà ha il luf da la Bregaglia attatgà 14 giadas ed ha cumprovadamain stgarpà 50 nursas e tschuts. Vitiers vegnan anc pliras nursas blessadas. Ulteriurs animals n'èn anc adina betg chattads. Animals stgarpads vegnan indemnisads da la confederaziun resp. dal chantun. I n'èn dentant betg mo ils donns d'animals ch'ils purs bergiagliots han da deplorar. Plitost fan els quitads pervia da la surveglianza intensiva da las nursas ch'è daventada necessaria e pervia da l'intschertezza per lur animals ch'è latentamain avant maun. Latiers vegnan els sustegnids cun pled e fatg da spezialists da la gruppa da perscrutaziun per il management dals animals gronds da rapina (KORA) ch'è incumbensada da la confederaziun. Cun saivs electricas e cun ina pastriglia intensiva da las muntaneras da nursas han ins empruvà d'engrevgiar al luf da s'approximar a las muntaneras da nursas. Malgrà las mesiras da protecziun raschunaivlas ch'ins ha prendì èsi adina puspè reussì al luf d'entrar en muntaneras da nursas e da stgarpar animals.
Sin fundament dals fatgs existents ha la regenza grischuna concludì da dar ina permissiun da schluppettar il luf bergiagliot, en cunvegnientscha cun l'UFAGC e resguardond il concept dal luf. Mo uschè po vegnir mantegnì en l'avegnir in clima da dialog e da confidenza e cun quai in clima da collavuraziun. L'inspecturat da chatscha e pestga dal chantun Grischun è vegnì incumbensà da realisar l'acziun.

Gremi: Departament da construcziun, traffic e selvicultura dal Grischun
Funtauna: rg Inspecturat da chatscha e pestga