Durant l'aperitiv d'energia da mesemna ils 29 d'avust vegnan discutadas las tendenzas dal turissem e da l'ecologia. En il center stattan exempels concrets da l'Engiadina.

Cun il project "Clean Energy St. Moritz" duai vegnir mess in segn per la natira e l'energia schubra a chaschun dal campiunadi mundial da skis en l'entir mund. Vi d'in hotel da tschintg stailas che datescha da la sava dal tschientaner passà vegn mussà co ins po, grazia a sanaziuns e management da manaschi, evitar in consum d'ieli da stgaudar memia aut e custs d'electricitad memia gronds en hotels.
L'aperitiv d'energia ha lieu a las 17.00 a la scol'auta da tecnica ed economia a Cuira. Sco referents èn annunziads dr. Hans P. Danuser, directur da cura da San Murezzan; dr. Jürg Domenig, administratur da l'uniun grischuna d'hoteliers; Felix Dietrich, directur da l'hotel Waldhaus; l'expert d'energia Klaus Ulmer sco er dr. Max Zürcher, administratur da l'agentura d'energia da l'economia.
Il project d'energia cumplet "Clean Energy St. Moritz" è ina strategia ecologica da vendita activa per la regiun. Amez il territori da skis Corviglia/Piz Nair, nua che han lieu las cursas da skis dal campiunadi mundial d'enviern 2003, duain vegnir construids implants d'energia solara e d'energia dal vent che mussan exemplaricamain che San Murezzan ed il campiunadi mundial da skis han speranza en funtaunas d'energia regenerablas. L'engaschi serva il medem mument a la natira sco er a l'attractivitad da la destinaziun da vacanzas.
Hotels possedan gronds potenzials da spargn tar il consum d'energia e tar ils custs da manaschi per la tecnica da chasa. A l'hotel da tschintg stailas Waldhaus a Segl Maria èsi reussì da sbassar ils custs d'energia e la grevezza per l'ambient grazia ad investiziuns sistematicas. Las mesiras principalas èn stadas l'isolaziun termica efficazia dals tetgs, da las fatschadas e da las fanestras, l'installaziun d'ina centrala termoelectrica sin distanza che producescha il medem mument electricitad e chalira sco er la recuperaziun da la chalira en il bogn cuvert, en la sauna ed en ils locals da sferdentar. Il directur da l'hotel, Felix Dietrich, crai ch'ina natira intacta saja il chapital principal per in'existenza segira dal turissem engiadinais. Ses engaschi na sa ferma perquai betg tar l'isch da l'hotel. Ina direcziun ecologica da l'hotellaria ha in avegnir e serva sco argument da reclama effectiv.
La taxa da CO2 po vegnir evitada: manaschis che s'obligheschan da reducir lur emissiun dal gas da serra CO2 sin ina tscherta mesira vegnan liberads d'ina eventuala taxa. L'agentura d'energia da l'economia vul discutar cun l'hotellaria grischuna sch'ils manaschis d'hotel èn pronts da s'engaschar communablamain per la protecziun dal clima.

Gremi: uffizi d'energia dal Grischun
Funtauna: rg uffizi d'energia dal Grischun