Per ils onns 2002 e 2003 èn las vischnancas grischunas vegnidas repartidas da nov tenor lur capacitad finanziala. Il dumber da vischnancas per gruppa cun capacitad finanziala è sa midà mo minimalmain. La repartiziun en las singulas gruppas mussa il suandant maletg:
gruppa 1, da fitg gronda forza finanziala, 26 vischnancas (perioda precedenta 26)
gruppa 2, da gronda forza finanziala, 26 vischnancas (31)
gruppa 3, mez ferm, mez flaivel, 56 vischnancas (52)
gruppa 4, flaivel da finanzas, 51 vischnancas (50)
gruppa 5, fitg flaivel da finanzas, 53 vischnancas (53)
Per 178 vischnancas na datti nagina midada. Las 34 vischnancas restantas han midà lur gruppa, da quellas èn 19 descendidas e 15 avanzadas. En 14 cas èn midadas dal pe da taglia stadas responsa-
blas per la midada da classa. Tar otg vischnancas ha ina forza fiscala sbassanta chaschunà la classificaziun en ina gruppa pli flaivla da finanzas, entant che diesch vischnancas èn daventadas pli fermas da finanzas grazia ad ina forza fiscala creschenta (taglias e forza idraulica). Suenter che las midadas da classa valitadas tenor la quantitad, però er tenor il dumber d'abitants, èn quasi equilibradas, èn las consequenzas sin l'autezza da las contribuziuns dal chantun a las vischnancas pitschnas. La survista detagliada vegn publitgada en il Fegl uffizial dal chantun Grischun.

Da regiuns e vischnancas
La revisiun parziala dals statuts da la corporaziun regiunala Pro Prättigau e la constituziun cirquitala dal circul da Valragn vegnan approvadas.
Ils uffizis da stadi civil da Castasegna/Bondo, Soglio, Stampa e Vicosoprano vegnan reunids a partir da l'october ad in sulet uffizi da stadi civil dal circul da la Bergiaglia cun sedia a Vicosoprano.
Il project integral forestal "Poschiavo 2001" (dustanzas cunter la tgira dal guaud, las bovas e la crudada da crappa) vegn approvà. Vi dals custs totals da var 10.5 milliuns francs vegnan garantidas contribuziuns dal chantun da var dus milliuns francs.
Il project preliminar per cumplettar e sanar la scolina en la chasa communala e la chasa da scola da Castasegna vegn da princip approvà. Vi dals custs imputabels da circa 185'000 francs vegnan garantidas contribuziuns dal chantun da 40 pertschient.
L'installaziun d'in muntastgalas en la scola da Sta. Maria/Puschlav vegn approvada. Vi dals custs d'investiziun da 43'000 francs vegn garantida ina contribuziun da 25 pertschient.

Persunal
- Anne Kathrin Frei, nata 1970, da Rietheim AG, domiciliada a Cuira, daventa a partir dal settember miedia superiura en l'ospital da dunnas Fontana.
- Peter Crufer, nat 1948, da ed a Domat, daventa schef da l'administraziun da finanzas. El daventa tenor cunvegna successur da Willi Benz che vegn pensiunà la fin d'avust 2002.
- Urs Durrer Maissen, nat 1966, da Kerns OW, domicilià a Cuira, daventa manader da project tar l'uffizi da sanadad.
- Daniel Spadin, nat 1971, da Razén, domicilià a Cuira, daventa inquisitur tar la procura publica.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun