Durant las emnas passadas ha il laboratori chemic per la controlla
da victualias e la protecziun da l'ambient dal Grischun examinà 33
products da charn pertutgant eventualas parts da material da ristga da
BSE. En naginas da las emprovas n'è vegnida chattada ina valur
cumprovabla da tscharvè u da magugl dal dies dals bovs cun suspect da
BSE.
Il tscharvè ed il magugl dal dies dals bovs vegnan considerats sco
material da ristga principal per transmetter prions en connex cun BSE
(Bovine Spongioforme Enzephalopathie) e la nova furma da la CFJ
(malsogna Creutzfeldt-Jakob) che sa mussa tar ils umans. Ils prions èn
ina furma irregulara d'in protein da l'agen corp. Els arrivan tras la
chadaina da mutriment en il corp e chaschunan là, tenor las
enconuschientschas d'ozendi, malsognas degenerativas dal sistem central
da la gnerva che mainan a la mort.
Dapi il november 1990 èsi scumandà da duvrar il tscharvè ed il
magugl dal dies dals bovs en mangiativas. Cun agid d'ina nova metoda
d'analisa, sviluppada da l'uffizi federal per veterinaria, èsi uss
pussaivel da cumprovar material da ristga en mangiativas elavuradas.
Cun questa metoda ha il laboratori chemic per la controlla da
victualias e la protecziun da l'ambient dal Grischun enfin uss examinà
33 emprovas (charniez, servelas, murtadella, terrinas, liongias da dir
e. u. v.) concernent eventualas substanzas da tscharvè e magugl dal dies
da bovs. La gronda part da las emprovas eran vegnidas producidas da
mazlarias en il chantun Grischun, intginas emprovas da la Germania eran
vegnidas pretendidas dals distribuiders a l'engrossa.
Per fortuna n'è vegnì chattà en naginas da las emprovas pretendidas
tscharvè u magugl dal dies da bovs. Ils resultats èn vegnids confermads
cun ina segunda metoda.
Las examinaziuns concernent material da ristga da BSE en mangiativas
vegnan cuntinuadas dal laboratori chemic per la controlla da victualias
e la protecziun da l'ambient dal Grischun.
Gremi: departament da giustia, polizia e sanitad dal Grischun
Funtauna: rg laboratori chemic per la controlla da victualias e la
protecziun da l'ambient dal Grischun