Navigation

Inhaltsbereich

  • Erste Mitteilung
  • Neuen Beitrag einfügen
La cumissiun predeliberanta dal cussegl grond propona al cussegl grond da far ina cuntraproposta a l'iniziativa per premias supportablas da la cassa da malsauns e da recumandar da refusar l'iniziativa.

La cuntraproposta s'orientescha directamain tenor la grevezza da las premias per la populaziun e garantescha che la grevezza annuala restia en limitas supportablas. L'iniziativa sa referescha al grad d'exauriziun dals meds federals (almain 75 pertschient). Sco ch'il passà ha mussà n'è quai dentant betg adattà sco valur directiva per la reducziun da las premias.

La cumissiun predeliberanta dal cussegl grond è s'occupada sut il presidi da Fabrizio Keller (PCD) ed en preschientscha da cusseglier guvernativ Peter Aliesch en duas sesidas d'in entir di da l'iniziativa chantunala dal pievel per premias supportablas da la cassa da malsauns e da la cuntraproposta preschentada da la regenza per quest intent. Plinavant ha ella tractà il project da la regenza per ina revisiun parziala supplementara da la lescha davart l'assicuranza da malsauns e la reducziun da las premias.

La cumissiun predeliberanta va d'accord cun la regenza e las iniziantas ed ils iniziants ch'en il futur sajan necessaris meds supplementars per la reducziun da las premias, spezialmain per reducir en ina dimensiun suffizienta las premias da las persunas assicuradas en relaziuns economicas modestas. Il diever dals meds per cuntanscher questa finamira vegn probablamain a s'augmentar er en il futur. L'iniziativa tegna memia pauc quint da questa circumstanza. La cuntraproposta preschentada da la cumissiun predeliberanta al cussegl grond è orientada tenor l'effect. Ella sa distingua da l'iniziativa en quel senn ch'en la lescha vegn prescritta, enstagl dal grad d'exauriziun da las contribuziuns federalas, la part maximala da las premias da la cassa da malsauns ch'è dependenta da las entradas imputablas d'ina chasada. Cun contribuziuns per reducir las premias vegn reducì il pretsch da quella part da la premia generala che surpassa la resalva persunala imputabla d'ina chasada. L'autezza da las resalvas persunalas furma pia la valur decisiva per la direcziun sociopolitica da la reducziun individuala da las premias (RIP). Il volumen RIP necessari e pia er il grad d'exauriziun necessari da la contribuziun federala è ina valur consecutiva. Il volumen resulta da la differenza tranter l'autezza da la premia e la resalva persunala da tut las chasadas. L'augment annual da las premias vegn egualisà per la populaziun ch'obtegna in sustegn, e quai cun contribuziuns RIP che s'augmentan correspundentamain. La resalva persunala duai muntar per las entradas imputablas fin 10'000 francs maximalmain tschintg pertschient e partind da quai per scadina ulteriura categoria d'entradas da 10'000 francs s'augmentar per maximalmain mintgamai in pertschient fin maximalmain diesch pertschient. Cuntrariamain a la proposta da la regenza propona ina minoritad da la cumissiun da fixar la resalva persunala maximalmain admissibla per entradas imputablas fin 60'000 francs, per mintgamai in punct da pertschient pli bass. La differenza tranter las tariffas per la resalva persunala sa chatta pia tranter quatter (enstagl da tschintg) e maximalmain diesch pertschient.

La cumissiun predeliberanta e la regenza resguardan il grad d'exauriziun dals meds federals sco ina valur directiva nunadattada per mantegnair la grevezza da premias da las chasadas en limitas supportablas. Cun la prescripziun d'in tschert grad d'exauriziun, sco ch'el vegn pretendì dal comité d'iniziativa, n'ha la populaziun betg la garanzia che persunas en relaziuns economicas modestas obtegnian suffizientamain contribuziuns a las premias, e quai perquai che l'iniziativa na prevesa betg limitas da grevezza per las chasadas.

Sch'ins acceptass la cuntraproposta en la furma proponida da la maioritad da la cumissiun, alura vegniss l'entir import da meds RIP per l'onn 2003 probablamain a s'augmentar sin var 60 milliuns francs (grad d'exauriziun 66 pertschient, oz 55 pertschient), per l'onn 2004 sin 63.5 milliuns (exauriziun 69 pertschient) e per l'onn 2006 sin passa 70 milliuns francs (exauriziun 75 pertschient).

Ils puncts principals da la part da la revisiun da la LARP independenta da la l'iniziativa èn la realisaziun da las midadas da la LAM dals 24 da mars e dals 6 d'october 2000, l'introducziun da la surprendida cumpletta da las premias per persunas cun in sustegn public u cun contribuziuns da maternitad e l'introducziun da la participaziun da las vischnancas da 20 pertschient da la contribuziun chantunala a la reducziun da las premias, per evitar in spustament da las grevezzas da las vischnancas al chantun. Quests puncts da la revisiun predendan ulteriurs meds RIP en la dimensiun da quatter fin tschintg milliuns francs. Il grad d'exauriziun da las contribuziuns federalas s'augmenta uschia annualmain per ulteriurs var tschintg puncts da pertschient.

La cumissiun predeliberanta retegna utils ils puncts da revisiun proponids da la regenza per realisar las midadas da la LAM. Ella beneventa er l'introducziun da la surprendida cumpletta da las premias per persunas cun in sustegn public e cun contribuziuns da maternitad. La cumissiun è da divers parairi en la dumonda, sche la participaziun da las vischnancas a la reducziun da las premias duaia vegnir introducida.

Il cussegl grond vegn a tractar la fatschenta en la sessiun d'october. Probablamain vegnan preschentads quests projects ils 3 da mars 2002 al pievel per la votaziun.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond
Neuer Artikel