Zum Seiteninhalt

Segirezza al WEF:

La confederaziun sa participescha als custs da segirezza dal chantun Grischun. Ina part da 3.26 milliuns dals custs vegn surpigliada.
Il cussegl federal ha concludì mesemna, ils 29 d'avust davart sia participaziun finanziala als custs da segirezza en il rom dal World Economic Forum a Tavau (WEF) 2001. La confederaziun paja 3.26 milliuns francs vi da las expensas per il dispositiv supplementar en favur da persunas protegidas dal dretg internaziunal. Quest sustegn succeda cun resalva da l'approvaziun dal credit posteriur respectiv tras l'assamblea federala. A medem temp desista la confederaziun da sia pretaisa da circa 820'000 francs visavi il chantun Grischun en connex cun l'acziun dal corp da guardias da cunfin. Il cussegl federal ha ultra da quai fixà il modus da calculaziun per ses engaschament futur vi dal WEF.
Gia avant in onn aveva il cussegl federal concludì da qualifitgar il WEF - a basa da sia significaziun unica e sias consequenzas per ils interess internaziunals da la Svizra - sco eveniment extraordinari e da surpigliar a partir da 2001 80 pertschient dals custs per il dispositiv supplementar en favur da persunas protegidas dal dretg internaziunal (chaus da stadis, schefs da regenza, commembers da regenzas en uffizi, commembers da chasas roialas e curts da prinzis e.u.v.). Ils 19 da zercladur 2001 ha orientà la giunta WEF da la regenza grischuna en occasiun d'ina discussiun a Berna ina delegaziun dal cussegl federal davart ils custs dal WEF 2001.

Co vegn calculada la part da la confederaziun?
Ils custs da segirezza dal chantun Grischun muntan totalmain a circa 7.83 milliuns francs (senza las pajas da la polizia chantunala grischuna). La calculaziun dal dispositiv supplementar sa basa sin la part da la confederaziun vi da las expensas per ils singuls secturs da segirezza (center da congress, protecziun da persunas, escortas, surveglianza da hotels, segirar trajects ed auters). Ils custs zavrads uschia per il dispositiv supplementar muntan a 4.08 milliuns francs. La confederaziun sa participescha a quels cun 80 pertschient, quai fa ina contribuziun da 3.26 milliuns francs.
La confederaziun desista ultra da quai da la contribuziun dal chantun Grischun vi da l'acziun dal corp da guardias da cunfin en l'autezza da 820'000 francs. L'onn passà ha il cussegl federal er approvà ina dumonda correspundenta per il WEF 2000.
Er en il futur duai la part da la confederaziun muntar ad 80 pertschient dals custs per il dispositiv supplementar che vegnan calculads, sco tar il WEF 2001, mintgamai cun agid d'ina zavrada dals custs. Questa participaziun vegn limitada en il futur a trais otgavels (3/8) dals custs da segirezza dal chantun Grischun (las pajas excludidas). Plinavant na vegnan en avegnir betg pli mess a quint al chantun Grischun ils custs per acziuns dal corp da guardias da cunfin.

Gremi: cussegl federal
Funtauna: rg departament federal da giustia e polizia