La regenza grischuna propona da betg reglar il congedi da maternitad en il DO, mabain en la lescha davart la cumpensaziun dal gudogn. Uschia po vegnir ademplida bler meglier l'incumbensa constitutiva da blers onns davart l'introducziun d'in'assicuranza da maternitad.
La confederaziun propona da reveder il dretg d'obligaziuns (DO) e d'introducir in congedi da maternitad ch'ils patruns stuessan pajar. Questa proposta na po la regenza betg approvar per las suandantas raschuns:
- La finanziaziun proponida ha in effect negativ sin la politica da paja dals patruns envers las lavurantas che profiteschan d'in congedi da maternitad.
- Las lavurantas vegnissan dischavantagiadas.
- La proposta da la confederaziun vegniss a chaschunar distorsiuns da concurrenza tranter las interpresas.
- Il congedi da maternitad pajà fiss be limità a dunnas cun in'activitad da gudogn dependenta.
Il model cun ina schliaziun en il DO proponì da la confederaziun è da refusar per motivs economics, socials e da la politica famigliara. L'assicuranza da maternitad ha intent sociopolitic e n'è betg problem dal dretg da lavur. La proposta cun ina schliaziun en il DO è pia sfurzadamain plain sbagls concepziunals.
Cun la schliaziun en il DO proponida vegniss per consequenza cuntrafatg a la finamira politica ed economica da princip renconuschida oz d'augmentar la participaziun da las dunnas al martgà da lavur, perquai ch'i vegniss qua tras engrevgià a las dunnas che profiteschan d'in congedi da maternitad da participar al martgà da lavur.
Dal puntg da vista da la politica famigliara èsi fauss da restrenscher l'intent dal congedi da maternitad mo sin la dunnas cun in'activitad da gudogn dependent. In'assicuranza da maternitad che s'orientescha al patratg da solidaritad è er d'extender sin las dunnas che lavuran independentamain. Quai na dastgass oz deplorablamain betg esser acceptabel per la maioritad.
La regenza vesa ina schliaziun che permetta da realisar l'incumbensa constitutiva, d'introducir in'assicuranza da maternitad, en ina revisiun correspundenta da la lescha davart la cumpensaziun dal gudogn (LCG). En la LCG po vegnir prendida ina schliaziun, tar la quala ils motivs che s'opponan a la schliaziun en il DO, daventan praticamain dal tuttafatg obsolets.

Da vischnancas
La cunvegnientscha da las vischnancas Camuns, Surcasti, Tersaus ed Uors-Peiden, da s'unir a la vischnanca da Suraua, vegn approvada. En il senn d'ina reglamentaziun transitoria vegn repartida la vischnanca da Suraua sin fundament da l'index ordinari da la capacitad finanziala per ils onns 2002 e 2003 en la gruppa cun capacitad finanziala tschintg. La regenza suttametta in messadi correspundent al cussegl grond.

Persunal
Dorin Ritzmann, naschida 1959, da ed a Turitg, daventa media superiura a l'ospital da dunnas Fontana a Cuira. A partir da mez fanadur vegn ella ad esser occupada cumplettamain a Cuira. Davent da l'entschatta 2002 per part en l'ospital da Tusaun.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun