Il litterat e promotur da la lingua e cultura rumantscha Vic Hendry ed il dirigent d'orchester e promotur da musica Räto Tschupp retschaivan il premi da cultura 2001 dal chantun Grischun. La valur dal premi munta mintgamai a 15'000 francs. Ultra da quai surdat la regenza otg premis da renconuschientscha da mintgamai 10'000 francs e nov premis da promoziun da mintgamai 7'000 francs. Las surdadas han lieu venderdi ils 16 da november.
Vic Hendry survegn il premi da cultura per si'ovra litterara extendida ed impurtanta e ses gronds merits per la promoziun da la lingua e cultura rumantscha.
Räto Tschupp survegn il premi da cultura per sia lavur sco dirigent d'orchester e cunzunt per ses engaschi sco pionier da la musica contemporana ed era sco rescuvrider da musica istorica nunenconuschenta.

Premis da renconuschientscha
Premis da renconuschientscha en l'import da 10'000 francs vegnan concedids a:
- Raimund Alig per sias grondas prestaziuns sco dirigent e pedagog da musica e ses engaschi extraordinari per la musica instrumentala en il Grischun,
- Annamengia Bertogg per sia creaziun litterara che ha enritgì la litteratura rumantscha en sia moda subtila e sensibla,
- Peter Donatsch per sia creaziun engaschada e vasta cun pled ed illustraziun che fa chapir meglier ad in grond public la natira, ils umans e la cultura dal Grischun,
- Rico Falett per sias grondas prestaziuns culturalas e ses engaschi nunstanclentaivel sco admonider da la societad,
- Mario Grazia per sia impurtanta lavur da teater en dialect puschlavin e ses grond engaschi per mantegnair l'ierta linguistica e culturala da la Val Puschlav,
- Luzius Hassler per sias grondas prestaziuns sco dirigent e pedagog da musica e ses engaschi extraordinari per il chant en il Grischun,
- Anna Lenz per si'ovra sco documentadra fotografica d'architectura grischuna e sco artista visuala, ed a
- Peter Rieder per ses grond engaschi per il svilup d'ina nova politica agrara e cunzunt per ses engaschi en favur d'in svilup da vischnancas prudent a l'exempel da Vrin, che colliescha l'agricultura, las structuras d'urbanisaziun tradiziunalas e las valurs culturalas.
Premis da promoziun
Premis da promoziun en la valur da mintgamai 7'000 francs survegnan:
Remo Arpagaus, decoratur da tribuna e musicist,
Ursina Brun, musicista,
Seraina Janett, musicista,
Marietta Jemmi, pedagoga da teater ed actura,
Zilla Leutenegger, artista figurativa,
Michel Pfister, artist figurativ,
Elvira Pünchera, scriptura e translatura,
Ariane Senn, actura, e
Vincenzo Todisco, scriptur.

Surdada dals premis
Ils premis vegnan surdads a chaschun d'ina festa venderdi, ils 16 da november, a las 17.15, en la sala dal cussegl grond.

Contribuziuns culturalas
A norma d'in uschenumnà conclus collectiv vegnan conderschidas contribuziuns en la summa totala da 357'700 francs a 68 instituziuns culturalas.

Consultaziuns a la confederaziun
La regenza s'exprima davart la revisiun parziala da la lescha d'asil e davart las midadas che stattan en connex cun quella en la lescha federala davart la dimora ed il domicil dals esters sco er en la lescha federala davart l'assicuranza da malsauns. Era sche tentativas da revisiun per ina legislaziun coerenta ed efficazia davart ils esters e davart l'asil vegnan da princip sustegnidas è il sboz da revisiun da repassar en tscherts puncts, cunzunt sin fundament da la stabilisaziun problematica da novs dretgs.
L'ordinaziun executiva tar la lescha federala davart las cundiziuns da lavur e da paja minimalas per las lavurantas ed ils lavurants tramess en Svizra e las mesiras accumpagnantas regla las modalitads da las cumissiuns tripartitas da la confederaziun. Talas èn previsas en las novas disposiziuns dal dretg d'obligaziuns davart il contract da lavur normal. La regenza na chatta betg standards minimals en il sboz d'ordinaziun che garanteschan ina tscherta unitad da l'execuziun en ils chantuns.
Las adattaziuns giuridicamain formalas da las ordinaziuns davart la segirezza d'installaziuns e d'apparats tecnics vegnan approvadas. Ellas gidan da dismetter impediments tecnics per il commerzi en il martgà intern da l'UE, al qual la Svizra sa participescha fermamain.

Persunal
Bernhard Marcus Riedi, naschì 1958, da Mustér, sesents a Glion, daventa inschigner forestal regiunal tar l'uffizi forestal. El entra en uffizi a l'entschatta da december.

Gremi: regenza
Funtauna: rg chanzlia chantunala dal Grischun