Sonda, ils 29 da settember 2001, ha pudì vegnir sajettà il luf da la
Bregaglia en la regiun Margna. In chatschader grischun ch'era en possess
d'ina permissiun speziala per mazzar il luf ha sajettà quel la sonda en
damaun a moda legala e cun in culp schuber.
La regenza grischuna ha concedì l'avust passà ina permissiun da
sajettar il luf bregagliot, quai en enclegientscha cun il UFAGC e
resguardond il concept dal luf en Svizra. Cun realisar quest'acziun han
ins incumbensà l'inspecturat da chatscha e da pestga dal Grischun. Quest
ha empruà l'emprim en ina gronda acziun cun ils organs da la
surveglianza da chatscha da sajettar il luf en la vischinanza da la
muntanera da nursas da Soglio. Durant la chatscha grischuna han ins
integrà en l'acziun chatschaders bregagliots ch'enconuschan bain la
regiun e che han obtegnì permissiuns spezialas. In da quels è stà abel
sonda passada da sajettar il luf. Tar il luf sajettà sa tracti d'in
animal masculin da 40 kilos. Il luf vegn manà en il museum grischun da
la natira per far in'examinaziun scientifica exacta.
Il luf bregagliot ha stgarpà dapi l'avrigl passà cumprovadamain 59
nursas, agnels e chauras e 5 tschiervs sin il territori svizzer. Sin il
territori talian da la Bregaglia duess el avair stgarpà 37 animals da
niz. Tut en tut ha il luf bregagliot stgarpà passa 100 animals durant
stgars in mez onn. Latiers vegnan anc numerus animals blessads e
sparids.
Ils purs bregagliots han prendì mesiras da protecziun en
collavuraziun cun la gruppa da perscrutaziun per il management dals
animals gronds da rapina (KORA), incumbensada da la confederaziun, ed
han intensivà la surveglianza da las muntaneras. Malgrà quai è il luf
adina puspè stà abel da penetrar en las muntaneras da nursas e da
stgarpar animals.
Durant ils proxims onns ston ins quintar cun ulteriurs lufs che
vegnan ad immigrar en Svizra. En collavuraziun cun l'agricultura ston
vegnir sviluppadas mesiras preventivas efficazias.
Scumond da publicaziun fin glindesdi, il 1. d'october a las 14.00
Inspecturat da chatscha e pestga
Gremi: inspecturat da chatscha e pestga
Funtauna: rg inspecturat da chatscha e pestga