La regenza ha prendì enconuschientscha dals resultats da la consultaziun. Cun quai han ins cuntanschì in'etappa impurtanta dal project da refurma. Cun l'elavuraziun dal sboz ha la regenza incumbensà il departament da giustia, polizia e sanitad dal Grischun.

Da cusseglier guvernativ dr. Peter Aliesch
Schef dal departament da giustia, polizia e sanitad dal Grischun

La consultaziun furmava en il senn d'ina discussiun dal pievel in'impurtanta etappa tar la revisiun totala da la constituziun chantunala. Dacurt ha la regenza prendì enconuschientscha dals resultats da la consultaziun. Cun quai è quest'impurtanta fasa terminada. Uss sa tracti da repassar il sboz e da scriver il messadi da la regenza al cussegl grond. Cun quai ha la regenza incumbensà il departament da giustia, polizia e sanitad dal Grischun, perquai che la cumissiun da constituziun na po betg pli prestar sias forzas sco cumissiun extraparlamentara en l'ulteriur decuors. Las lavurs duessan esser terminadas enfin la fin da quest onn.
Il cussegl grond vegn a cussegliar la missiva da la regenza l'onn che vegn. Las lavurs parlamentaras dastgassan s'extender sur l'entir onn. Il cussegl grond concluda il cuntegn da la nova constituziun chantunala e decida, sche ed eventualmain tge variantas che vegnan suttamessas separadamain a la votaziun dal pievel. La votaziun dal pievel dastgass bain avair lieu l'onn 2003.
Il concept general approvà da la regenza aveva laschà avert la dumonda, sche l'elavuraziun dal sboz duaja succeder entras la cumissiun da constituziun u entras l'administraziun. Suenter avair considerà tut ils aspects è la regenza da l'idea ch'in mandat a la cumissiun da constituziun na daventia betg necessari. La regenza considerescha plitost sco adequat sche l'elavuraziun vegn fatga entras il departament da giustia, polizia e sanitad dal Grischun tenor las directivas da la regenza. Suenter ch'il sboz da la cumissiun è vegnì prendì si da princip positiv en la consultaziun na daventa necessaria nagina reorganisaziun extendida. Ils puncts contestads, dals quals jau ma sun occupà en las contribuziuns d'antruras, pertutgan cunzunt tschertas novaziuns impurtantas dal cuntegn ed èn da natira politica. Uss sa tracti da giuditgar ed evaluar las propostas e las dumondas inoltradas. Questa procedura da decisiun politica en furma d'ina dumonda al cussegl grond fa part da las incumbensas centralas da la regenza. Ella ha da represchentar la revisiun totala da la constituziun chantunala er en il cussegl grond sco impurtant project da refurma statal e politic.
Communablamain duai vegnir creada ina constituziun moderna, manaivla al burgais ed orientada vers l'avegnir per noss chantun. Quest'incumbensa han las persunas cun dretg da vuschar dà a la regenza ed al cussegl grond cun lur decisiun da princip dal 1997. Per che la finamira possia
vegnir cuntanschida è la constituziun er da considerar sco ovra cumpletta. La constituziun sto empruvar da tschiffar ils tratgs cuminaivels entaifer il chantun en il senn d'in consens fundamental. Per che la constituziun furmia in fundament solid per noss chantun sto ella vegnir acceptada d'ina gronda maioritad da las persunas cun dretg da votar e vegnir stimada per buna. I vala pia da preschentar in sboz equilibrà.

Gremi: departament da giustia, polizia e sanitad dal Grischun
Funtauna: rg departament da giustia, polizia e sanitad dal Grischun