Cun ina concurrenza vul la cuminanza da lavur prevenziun da tubac en Svizra (at) sustegnair las giuvenilas nunfimadras ed ils giuvenils nunfimaders.
Classas dal 6. - 9. onn da scola pon prender part. Ellas s'obligheschan da betg fimar durant 6 mais. Sco emprim premi pon ellas gudagnar in attractiv viadi da scola organisà. La concurrenza da classas che vegn purschida en l'entira Svizra entschaiva ils 29 d'october. En il chantun Grischun vegn coordinada l'acziun entras la Zepra, center per prevenziun e promoziun da la sanadad.
Fimar è moda. Ils giuvenils cumenzan adina pli baud cun quai e tar blers fa part il fimar da la buna reputaziun d'in teenager dad oz. Igl è dentant in fatg che la maioritad dals giuvenils en questa vegliadetgna èn nunfimadras e nunfimaders. Cun l'acziun experiment betg fimar vulan las organisaziuns participadas sustegnair quests giuvenils en lur cumportament. Giuvenils fan l'experientscha ch'i vala la paina da desister da fimar. Ma era per giuvenils che fiman sa dat ina chaschun da reflectar il cumportament da fimar.

Gudagnar pon tuts
La concurrenza vegn realisada en 2 categorias. En la categoria A s'oblighescha l'entira classa da betg fimar durant 6 mais. En la categoria B s'obligheschan - tut tenor la grondezza da la classa - 80 fin 90 pertschient da las scoalras e dals scolars da restar senza fim durant quest temp. Las classas che prendan part ston quintar da vegnir envidadas en il studio da televisiun u da vegnir visitadas da schurnalist(a)s. Igl è pussaivel ch'ina squadra da controlla visita senza s'annunziar la classa e fa tests.
En tuttas duas categorias vegnan surdads il zercladur 2002 trais emprims premis. Sco premis èn empermess attractivs viadis da scola organisads. Sin tuts ch'èn sa participads spetga alura er ina surpraisa supplementara.

Annunziar e sa participar
Il termin d'annunzia curra gia e finescha cun il cumenzament da la concurrenza ils 29 d'october 2001. Il pli simpel èsi da s'annunziar via internet ed e-mail. Tuttas infurmaziuns necessarias èn da chattar sut www.ges.ch. Ils fegls sgulants da concurrenza èn vegnids tramess entras la Zepra a tuttas direcziuns da scola da las chasas da scola dal stgalim mesaun e dal stgalim superiur en il chantun Grischun. Ulteriurs exemplars pon vegnir empustads en pli per telefon tar la Zepra sut il numer 081 252 53 50.

Segunda ediziun
En numerus pajais da l'UE vegn realisada ina tala acziun gia dapi plirs onns cun success. L'onn passà han fatg sensaziun duas concurrenzas da scolars en Svizra. Var 1000 classas èn s'annunziadas per l'experiment betg fimar. In pèr tschients han stuÌ smetter durant l'acziun perquai ch'igl è vegnì fimà. Las bleras classas han avisà sinceramain lur partenza. Autras èn pir vegnidas trapladas entras las squadras da test. Per la concurrenza "Let it be - betg fimar e gudagnar" èn s'annunziadas 1257 classas. Var trais quarts èn stads buns da restar sis mais senza fim. Per quest onn da scola èn vegnidas reunidas las duas acziuns.
ZEPRA Zentrum für Prävention und Gesundheitsförderung
Untere Gasse 23, 7000 Chur
Tel. 081-252 53 50, Fax 081-252 41 23, E-Mail: zeprachur@gd-zepra.sg.ch

Gremi: ZEPRA Cuira
Funtauna: rg ZEPRA Cuira