Navigation

Inhaltsbereich

  • Erste Mitteilung
  • Neuen Beitrag einfügen
La prevenziun e l'educaziun sanitara en las scolas grischunas duain vegnir extendidas sistematicamain. Premess ch'il cussegl grond va d'accord, vul la regenza metter a disposiziun totalmain 240'000 francs per ina fasa da pilot da dus onns (2002 e 2003).
Ins spetga adina dapli da la lavur da prevenziun en las scolas. Tras ina promoziun da la sanadad ed in'educaziun sanitara intensivada vulan ins tegnair davent las scolaras ed ils scolars da l'alcohol, dal nicotin e d'autras drogas e motivar els ad in stil da viver saun. Oz ston ins deplorablamain constatar che giuvenils sut 16 onns baivan puspè pli savens alcohol e fiman. Per rumper questa tendenza duain vegnir intensivadas las stentas da la prevenziun e da l'educaziun sanitara. Igl è previs da sustegnair cun in accumpagnament professiunal projects adattads a las scolas grischunas u da cumprar projects existents. Las stentas actualas èn stadas per gronda part be punctualas e casualas. En il futur ston ins pudair porscher en las scolas dapli projects coordinads puncto lur cuntegn.

La scola bilingua da Cuira vegn extendida

L'experiment da scola "Scola bilingua en la citad da Cuira" ha cuntanschì il segund onn da scola. Las experientschas fatgas fin uss èn positivas. Uss duai il project vegnir extendì sin il rom matematica. Il project accessori custa annualmain 3'000 francs. La direcziun dal project ha l'inspecturat da scola Plessur.

Stimaziuns d'edifizis en 23 vischnancas grischunas

Per regla vegnan las stimaziuns da las immobiglias surbajegiadas revedidas tenor vischnancas mintga diesch onns. A partir dal 2002 vegnan stimads da nov ils edifizis en las sequentas 23 vischnancas: Haldenstein, Says, Stussavgia, Luzein, Valzeina, Medel, Val S. Pieder, Brusio, Soglio, Lü, Tschlin, Farera, Runcaglia, Ziràn-Reschen, Alvaschagn, Churwalden, Mon, Mut, Stierva e Tschiertschen.

Contribuziuns culturalas

Per ils sequents projects culturals resp. las sequentas instituziuns culturalas vegnan concedidas contribuziuns da totalmain circa 41'000 francs:
- Uniun da ludotecas dal Grischun per activitads culturalas particularas sin il sectur da la promoziun da la giuventetgna,
- Societad da musica Sedrun vi da l'uniformaziun nova, e
- Uniun purila grischuna vi da l'ediziun dal cudesch "Heugabel & Computer" en occasiun dal giubileum da 150 onns da l'uniun.

Agid umanitar

I vegnan concedidas contribuziuns en la summa totala da 22'000 francs a las sequentas organisaziuns d'agid resp. als sequents projects d'agid:
- Médecins sans Frontières per projects en favur da la populaziun civila da Burundi ch'è incapavla da sa defender en il cumbat cunter la fom, la malaria, l'Aids ed autras epidemias,
- Terre des hommes agid als uffants en favur dal project "Mamma ed uffant program da sanadad" en il nord da Bangladesh,
- Paun per tuts en favur dal project "Ospitals Mbozi ed Isoko" en il sidvest da Tansania,
- Agid dals lavurants svizzers en favur dal project da reconstrucziun "Mais Indio" ad El Salvador,
- Swisscontact, fundaziun svizra per la cooperaziun tecnica al svilup, en favur dal project "Ecologia da citad" a Bolivia, e
- Uniun "Pro Predeal Bravuogn" (agid a la Rumenia) vi dals custs da transport.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel