La fin d'october va Simon Wehrli en pensiun. El ha influenzà e furmà sco schef durant bunamain trais decennis l'uffizi da megliuraziun e mesiraziun dal chantun Grischun.
Suenter ils studis a la SPF a Turitg ha Simon Wehrli lavurà da mez avust 1960 enfin la fin settember 1964 sco referendari agricul en l'uffizi da megliuraziun e mesiraziun. Las enconuschientschas sco inschigner agronom per il giudicament agricul ed economic da las associaziuns da megliuraziun ha Simon Wehrli pudì rimnar en la dira confruntaziun cun la realitad tar las megliuraziuns generalas da Bravuogn, S-chanf, Lavin, Sur (Valragn), Masagn e Flearda-Urmagn.
Suenter in'activitad da quatter onns tar l'uffizi da megliuraziun e mesiraziun è Simon Wehrli sa rendì en l'aglomeraziun da Turitg. Dasper ses studi supplementar da construcziun idraulica tecnic-culturala, da construcziun da vias da guaud e da vias champestras, da scienza da mesiraziun, da megliuraziuns da las alps e da fatgs da construcziun agriculs a la SPF a Turitg ha el entschavì a lavurar en in biro d'inschigner ad Effretikon. El è avanzà en quella firma l'emprim a schef da la partiziun tecnica culturala e curt suenter a priminschigner e commember da la direcziun.
La regenza ha elegì Simon Wehrli il schaner 1974 sco schef da l'uffizi da megliuraziun e mesiraziun dal chantun Grischun. Sut sia direcziun èn vegnids mess fundaments decisivs en ils fatgs da megliuraziun e per ovras da mesiraziun ch'èn orientadas vers il futur. In dals puncts centrals da sia activitad è stada la realisaziun da la cartaziun da las pastgiras sco basa da decisiun per las sanaziuns da dapli che 100 alps. Visiunaras èn era stadas sias ideas, fixadas oz en la lescha da megliuraziun, da conceder a las vischnancas la pussaivladad da concluder davart megliuraziuns generalas. El ha plinavant realisà la muntada da las datas da la mesiraziun uffiziala sco basa essenziala per bunamain tut ils secturs che sa fatschentan cun funs e natira. Uschia è la cumbinaziun da l'arrundaziun dal terren e la mesiraziun uffiziala vegnida surdada en ina incumbensa unica per l'emprima gia el chantun Grischun.
Grazia a sias conuschientschas e sia integritad è Simon Wehrli ultra da questas incaricas s'occupà d'auters champs. L'enviern da lavinas 1975 ha la regenza incumbensà el cun il presidi d'ina giunta da coordinaziun che ha gì da prender en mira la lavur da reconstrucziun ed autras mesiras da protecziun per uschia garantir in futur a las regiuns pertutgadas. Dapi l'entschatta fanadur 1979 è el stà il responsabel per l'uffizi d'economia da guerra (da preschent il post per il provediment dal pajais). En auters chantuns han ins elegì Simon Wehrli sco expert da dumondas d'onurari ni da procedura ed en il Principadi dal Liechtenstein è el vegnì elegì sco president da la cumissiun da recurs per meglieraziuns dal funs.
Durant ses 27 onns d'activitad è Simon Wehrli s'engaschà per ina tenuta liberala ed averta envers la publicitad ed envers ils biros privats d'inschigner e d'architectura. Simon Wehrli abanduna in uffizi che ha cuntanschì sut sia direcziun prestaziuns ch'èn renconuschidas da tut las varts.
Jau engraziel cordialmain er en num da la regenza a Simon Wehrli per siu engaschament extraordinari. Ils megliers giavischs accumpognian el en la terza part da la vita ed jau sper ch'el chattia dapli temp per passentar cun sia gronda famiglia, cunzunt cun ses biadis, e per giudair ses culm.
Klaus Huber, cusseglier guvernativ

Gremi: departament da l'intern e da l'economia publica
Funtauna: rg departament da l'intern e da l'economia publica