Navigation

Inhaltsbereich

  • Erste Mitteilung
  • Neuen Beitrag einfügen
Ina cumissiun predeliberanta dal cussegl grond sut il presidi da deputà Carlo Portner ha tractà en preschientscha da cusseglier guvernativ Claudio Lardi la missiva e las propostas areguard la concessiun d'ina contribuziun chantunala a la restauraziun da la catedrala da Cuira. La cumissiun propona unanimamain al cussegl grond da s'occupar da la fatschenta e da conceder in credit d'obligaziun da 3.1 milliuns francs vi da las lavurs da restauraziun e da segirtad da la catedrala da Cuira.
La catedrala da Cuira è in monument architectonic singular e da muntada istoric-culturala d'impurtanza naziunala. La valur da questa catedrala è incontestada sur ils cunfins confessiunals e religius or. L'entschatta da las lavurs da construcziun da la catedrala datescha da la mesadad dal 12avel tschientaner, la consecraziun da l'edifizi roman tardiv è succedida l'onn 1272. 75 onns suenter la davosa renovaziun totala èn vastas lavurs da restauraziun danovamain indispensablas per pudair salvar il bajetg dal temp medieval. Gia dapi dus decennis lavuran persunas dal fatg da differentas disciplinas vi dals concepts da restauraziun per questa lavur pretensiusa. Il project ch'è vegnì approvà da la fundaziun da la catedrala cuntegna mesiras da restauraziun tant a l'interiur sco er a l'exteriur da la catedrala sco er impurtantas adattaziuns vi da l'inventari.

Suenter ina visita oculara ed ina minuziusa discussiun propona la cumissiun predeliberanta unanimamain al cussegl grond d'approvar il credit d'obligaziun da 3.1 milliuns francs proponì da la regenza. Chaschunà ina discussiun pli profunda ha la dumonda concernent la dimensiun e da l'autezza dals custs da la restauraziun. La cumissiun considerescha sco urgent che las lavurs da restauraziun vegnian accumpagnadas professiunalmain e che la controlla dals custs vegnia survegliada minuziusamain.
Il cussegl grond vegn a sa fatschentar da questa proposta en la sessiun da november. Il conclus dal cussegl grond è suttamess al referendum facultativ.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond

Neuer Artikel