L'inspecturat dal register funsil dal Grischun dispona d'ina
website: www.gbi.gr.ch. Ella cumpiglia ina gronda quantitad
d'infurmaziuns, formulars e links concernent manar il register funsil,
il dretg funsil agricul e l'acquist a terren tras persunas a l'ester.
Cun referiment al register funsil vegnan preschentads la repartiziun
en ils cirquits da register funsil, las adressas e las glistas da
telefon dals administraturs dals registers funsils sco er il stadi da
l'introducziun dal register funsil en il chantun Grischun. Plinavant
infurmescha l'inspecturat dal register funsil en furma concisa davart
las prescripziuns ch'èn d'observar per annunziar in act giuridic
(contract da cumpra, contract da constituziun d'in pegn, contract da
servitut ed auters pli) tar l'uffizi dal register funsil. Tar il dretg
funsil agricul vegnan descrittas las differentas disposiziuns legalas
valaivlas en cas d'acquist u d'impegnaziun d'immobiglias e da manaschis
e las premissas las pli impurtantas per conceder las differentas
permissiuns (permissiun d'acquist e da partiziun reala, permissiun da
surpassar il limit da la grevezza da pegn). Ultra da quai infurmescha la
website davart l'acquist da lavuratoris, abitaziuns principalas,
abitaziuns da vacanzas ed abitaziuns secundaras tras persunas a l'ester;
ella cumpiglia er ina glista da las restricziuns che valan en las
singulas vischnancas da noss chantun per l'acquist da terren tras
persunas a l'ester.
La website da l'inspecturat dal register funsil porscha infurmaziuns
impurtantas en ils trais secturs spezials che n'èn betg adina fitg
accessibels. Plinavant pussibilitescha ella als interessents da clamar
online ils formulars ils pli impurtants per las singulas proceduras da
dumonda u d'installar quests sin l'agen PC.
Gremi: inspecturat dal register funsil dal Grischun
Funtauna: rg inspecturat dal register funsil dal Grischun