Suenter l'eveniment tragic dals 27 da settember a Zug sa preschenta
la dumonda davart la segirtad da las instituziuns publicas en Svizra. La
regenza dal chantun Grischun incarichescha ina gruppa da lavur da
s'occupar da questa dumonda.
Suenter che la regenza ha ordinà mesiras da segirezza pli intensivas
per la sessiun d'october dal cussegl grond ha ella ina gruppa da lavur
che ha d'examinar las dumondas da segirtad tar las instituziuns publicas
e tar ils edifizis e da preschentar in rapport fin la primavaira 2002.
Partind dal princip che l'access a las instituziuns publicas duaja er
esser garantì en il futur tant sco pussaivel senza impediments vegn la
gruppa da lavur ad examinar intensivamain ils suandants champs: segirtad
en ils bajetgs, segirtad da las persunas e contact cun persunas ch'èn en
dispita cun las autoritads.
Da la retschertga vegnan exclusas las autoritads e las instituziuns
sin plaun communal, cirquital e districtual. Singulas recumandaziuns e
singuls resultats pon er esser nizzaivels per questas instituziuns.
A la gruppa da lavur sut la direcziun dal chancelier appartegnan
represchentants da las suandantas instituziuns: dretgira chantunala ed
administrativa, procura publica, polizia chantunala, servetsch
psicologic resp. psichiatric, uffizi da construcziun auta ed uffizi da
persunal.
Cur ch'il rapport menziunà è avant maun vegn la regenza a concluder
davart il proceder e davart las mesiras ch'èn d'interprender.
Nov contract general per medis assistents e medis superiurs
La regenza ha approvà il contract general per l'engaschament da
medis assistents e da medis superiurs als osspitals cun dretg da
contribuziun en il chantun Grischun. Il medem mument vegn abolì il
contract vegl per l'engaschament da medis assistents da l'onn 1995. Ils
osspitals dal chantun han d'adattar lur contracts cun ils medis numnads
sin l'entschatta d'avrigl 2002. La novaziun principala è quella ch'il
temp da lavur maximal vegn sbassà gradualmain entaifer tschintg onns sin
50 uras per emna. Suenter la realisaziun da quest pass resultan custs
supplementars da circa sis milliuns francs per onn.
Nov uffizi da stadi civil a Glion
Ils uffizis da stadi civil da Castrisch, Falera, Flond, Glion, Laax,
Ladir, Luven, Pitasch, Riein, Ruschein, Sagogn, Schluein, Schnaus e
Sevgein s'uneschan a l'uffizi da stadi civil da la Foppa cun sedia a
Glion. La reuniun cuntanscha vigur legala enfin il pli tard la fin
d'avrigl 2002 e cumpiglia tut las vischnancas dal circul da la Foppa cun
excepziun da Versomi e Valendau.
Fatgs dal persunal
Andrea Katja Beck, naschida 1971, da Sumiswald BE, domiciliada a
Zizers, daventa nova collavuratura dal stab projects tar la chanzlia
chantunala. Ella cumenza l'entschatta schaner 2002.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun