La regenza ha fixà las cundiziuns da basa structuralas per l'andament temporal dal studi a la scol'auta professiunala da pedagogia (SAP) sco er ils roms d'instrucziun e lur repartiziun quantitativa. Cun quest conclus e la planisaziun dal persunal ch'è vegnida concludida en il medem temp èn avant maun terms impurtants per l'entschatta da la SAP e la furmaziun gimnasiala scursanida.
Durant l'onn da studi 2003/04 cumenza l'activitad da la SAP. La scolaziun da basa da trais onns per las persunas d'instrucziun da la scola primara e per las mussadras da scolina survegn furma. Las furmaziuns da basa èn divididas mintgamai en tschintg roms da furmaziun modulars e possedan ina quota da furmaziun pratica da 25 pertschient. Cun questa auta quota da furmaziun pratica eliminescha la nova scolaziun a la SAP ina mancanza principala da la furmaziun "plitost teoretica" als seminaris. Las furmaziuns da basa s'orientescha d'ina vart tenor las structuras da scola dal chantun Grischun cun bleras scolas pitschnas e da l'autra vart tenor las directivas svizras per la renconuschientscha dals diploms. Ellas attribueschan ina grond'impurtanza als roms artistics. Per las futuras persunas d'instrucziun garanteschan las furmaziuns da basa la permissiun da dar scola per tut ils roms dal plan d'instrucziun da la scola primara.
L'onn da scola 2003/04 vegn er ad esser en vigur cumplaina la durada reducida per in onn da la furmaziun gimnasiala. Quai vegn a chaschunar ina reducziun considerabla dals pensums d'instrucziun a la scola chantunala grischuna. La regenza aveva rendì attent a las consequenzas per il persunal sin il champ da las scolas medias gia l'onn 1998 en la missiva tar la revisiun parziala da la lescha davart las scolas medias. Ultra da quai ha er la renunzia a la furmaziun da persunas d'instrucziun per lavurs a maun ed economia da chasa a la SAP per consequenza che vegnan engaschads damain docents per quest'instrucziun.
Las grondas midadas organisatorias a la scola chantunala grischuna, al seminari da magisters ed a la scola da dunnas dal Grischun cun lur consequenzas per il persunal pretenda ina planisaziun dal persunal che vegn fatga a temp. L'emprim pass da questa planisaziun ch'è uss concludida prescriva tge persunas d'instrucziun principalas dal seminari da magisters e da las partiziuns dal seminari da la scola da dunnas dal Grischun che vegnan ad instruir a partir da l'onn 2003/04 a la SAP e tgeninas che vegnan ad instruir a la scola chantunala. Ins vegn a vesair ch'i n'è betg pussaivel d'engaschar tut las persunas d'instrucziun pertutgadas a la SAP u a la scola chantunala grischuna. Per questas persunas d'instrucziun vegnan tschertgadas schliaziuns. Ils incumbensads cun l'instrucziun vegnan engaschads vinavant en il rom da las pussaivladads.

Gremi: regenza
Funtauna: rg departament d'educaziun, cultura e protecziun da l'ambient dal Grischun