Giuvenils en la vegliadetgna da la tscherna da la professiun s'occupan da lur perspectivas da vita. Per quest intent porscha il project "Piazza" dal post da stab per dumondas d'egualitad ina plattafurma.
Esser conscient dals agens maletgs e da las atgnas imaginaziuns, s'occupar, cumparegliar, barattar, discutar d'auters models da vita: Tge impurtanza ha mia professiun in di per mia vita? Tge basegns duai mia activitad professiunala ademplir, tge è impurtant per mai en quest connex? Vi jau in di famiglia? Co m'imaginesch jau l'organisaziun da la lavur en famiglia?
Il project dal post da stab per dumondas d'egualitad porscha spazi per questas dumondas. Durant in mez di s'occupan las scolaras ed ils scolars dal stgalim superiur da la secunda classa da las scolas secundaras e realas cun quest tema. Spezial èsi ch'els lavuran en gruppas da dunnas e d'umens, perquai ch'ella gruppa da las dunnas giuvnas predomineschan autras tematicas che tar ils umens giuvens. Qua vai plitost per la confruntaziun cun las perspectivas professiunalas (las dunnas tschertgan per gronda part anc adina furmaziuns pli curtas cun pli paucas schanzas da sa sviluppar). Là vegn discussiunada tranter auter la nova rolla ed ils novs models (er las realitads da vita dals umens sa midan, la "rolla dal nutrider" è ina rolla tranter autras, betg pli la suletta). La finamira dal project è quella da preschentar als giuvenils en la vegliadetgna d'eleger ina professiun ina perspectiva realistica ed a lunga vista per lur decisiuns professiunalas e da preschentar ad els sin fundament d'exempels concrets siemis da vita, realitads, furmas da vita enconuschentas e main enconuschentas e da discutar sur da quai. Ils giuvenils dovran exempels che preschentan models a moda chapaivla, las mattatschas dovran dentant auters models ch'ils mattatschs. Quest vegn realisà cun in lotto en furma da la vita, sviluppà aposta per quest project. Il lotto duvrà sco med da lavur purtretescha diesch dunnas e diesch umens cun differents models da vita. Ils moduls d'instrucziun vegnan manads d'ina partenaria e d'in partenari da discussiun. Uschia stattan a disposiziun als mattatschs in partenari ed a las mattatschas ina partenaria da discussiun.
Il project "Piazza" vegn realisà da trais persunas: Ariane Bearth-Riatsch, magistra, Lucio Decurtins, pedagog social e Justina Derungs, pedagoga da teater. Tuts trais vivan en differentas furmas da cumpatibilitad da la lavur familiara e professiunala e portan cun sai diversas experientschas da la lavur cun giuvenils.
"Piazza" vegn realisà a partir dal schaner 2002 ventg giadas en l'entir chantun. Las magistras ed ils magisters dal stgalim superiur pon reservar quest modul tar il post da stab per dumondas d'egualitad. Resguardond las experientschas da la realisaziun da quest project vegn edì in med d'instrucziun che po en il futur vegnir applitgà independentamain da las persunas d'instrucziun. Il project "Piazza" vegn finanzià cun daners dal conclus federal 2 davart las plazzas d'emprendissadi. Quest sustegna en furma da programs d'acziun contribuziuns per in meglierament persistent dal martgà da las plazzas d'emprendissadi e per in svilup da la furmaziun professiunala. Ina da las finamiras dal conclus federal davart las plazzas d'emprendissadi è la promoziun da l'egualitad effectiva da dunna ed um en il sectur da la furmaziun professiunala. En quest sectur è da domiciliar il project "Piazza".

Gremi: biro d'egualitad dal chantun Grischun
Funtauna: rg biro d'egualitad dal chantun