En ina brev communitgescha la regenza al cussegl federal ch'ella veglia surpigliar senza restricziun la funcziun da direcziun e la rolla d'ospitanta a chaschun dal World Economic Forum a Tavau.
La regenza ha prendì enconuschientscha cun satisfacziun che la realisaziun dal World Economic Forum a Tavau a partir da l'onn 2003 giauda in grond sustegn. En questa direcziun èn s'exprimì il cussegl federal, las partidas grondas, la cumissiun dal cussegl grond che tracta il rapport respectiv da la regenza ed ulteriurs tschertgels relevants. La regenza communitgescha al cussegl federal ch'ella vegnia a far tut il pussaivel per segirar ensemen cun ulteriurs partenaris ch'il World Economic Forum haja lieu en il futur a Tavau. Ella vegn a persequitar vinavant la via da l'avertura en il senn dal "Spirit of Davos" ed ella vegn a reglar las modalitads da realisaziun surtut er cun l'organisatur. Plinavant dumonda la regenza il cussegl federal da metter a disposiziun ad ella il sustegn organisatori e finanzial necessari cunzunt en il sectur da la segirtad. Ella è interessada da procurar uschè spert sco pussaivel per ina schliaziun dals problems ch'èn avant maun.
Persuna d'infurmaziun:
cusseglier guvernativ Klaus Huber, tel. 081-257 23 01
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun