La cumissiun predeliberanta dal cussegl grond sustegna da princip
las mesiras da la regenza e recumonda al cussegl grond da prender
conuschientscha dal program annual.
La cumissiun predeliberanta dal cussegl grond è s'occupada dacurt
sut il presidi da deputà Florian Juon ed en preschientscha da la
presidenta da la regenza, dr. Eveline Widmer-Schlumpf, dal program
annual 2002 da la regenza. Il program annual cumpiglia, analog al
program da la regenza 2001-2004, indicaziuns detagliadas e concretas
davart las mesiras ch'èn da realisar l'onn 2002. La cumissiun recumonda
al cussegl grond da prender conuschientscha dal program annual. La
cumissiun è da princip d'accord cun las mesiras inditgadas.
Differentas finamiras e mesiras vegnan discutadas detagliadamain.
Ultra da l'intensivaziun da las relaziuns cun l'exteriur previsa en il
program sustegna la cumissiun expressivamain l'elavuraziun d'ina
planisaziun integrada da las incumbensas e da las finanzas. Uschia duain
las activitads dal stadi vegnir dirigidas meglier. A basa dals conturns
midads suenter ils attentats da terror en ils stadis unids e suenter ils
eveniments a Zug ha la cumissiun fatg ponderaziuns davart la segirezza.
Ella ha prendì conuschientscha dal fatg che la regenza lascha elavurar
in concept da segirezza cumplessiv per occurrenzas grondas. Sin il
sectur da la realisaziun da la refurma da la furmaziun per la scol'auta
professiunala da pedagogia èsi tenor l'avis da la cumissiun da sclerir
la repartiziun da las incumbensas tranter las scolas medias chantunalas
e privatas.
En dus secturs propona la cumissiun al cussegl grond da dar
in'explicaziun. En connex cun la realisaziun da la refurma da la
furmaziun da l'onn 1998 per las scolas da furmaziun generala dal stgalim
secundar II e per la scol'auta professiunala da pedagogia porscha il
chantun gia prest l'instrucziun da manaders da scola. La pluralitad da
la cumissiun intimescha da circumscriver en la lescha las funcziuns dals
manaders da scola sco er lur subvenziun. Plinavant dat la cumissiun
grond'impurtanza a la cuntinuaziun dal WEF a Tavau a partir da l'onn
2003 e pretenda ch'i vegnian creadas las premissas necessarias.
Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond