La cumissiun predeliberanta dal cussegl grond ha tractà sut il presidi da deputà Gion Battaglia, Sched, ed en preschientscha da cusseglier guvernativ Klaus Huber la missiva e la proposta da la regenza areguard la fusiun da las vischnancas Camuns, Surcasti, Tersnaus ed Uors-Peiden a la vischnanca Suraua.

La fusiun da las vischnancas da Suraua ch'è vegnida concludida cun grond pli da la populaziun ha in caracter da model e signifitgescha in term impurtant en il Grischun sco exempel da fusiuns da las vischnancas che vegn purtada da la populaziun.

La cumissiun ha perquai vulì profitar da la chaschun da sa laschar orientar sin il lieu dals quatter presidents communals en uffizi davart quest pass istoric. La sesida da la cumissiun ha gì lieu a Camuns. Ils preschents han visità curtamain las vischnancas d'Uors-Peiden, Surcasti e Tersnaus. Malgrà che la fatschenta è stada incontestada ed ha chattà il consentiment dals commembers da la cumissiun han ins manà in discurs da princip davart las fusiuns da las vischnancas e singuls puncts da la cunvegnientscha da fusiun. En particular è vegnida discutada la dumonda da la posiziun da las singulas fracziuns, lur dretg d'avair vias chantunalas da colliaziun ed eventuals conflicts dal num Suraua cun il num da la vischnanca da Surava.

La cumissiun è persvadida che las vischnancas possian vegnir rinforzadas cun la fusiun e ch'ellas possian ademplir anc meglier lur pensums en favur da lur populaziun. Tut en tut po funcziunar la preparaziun e la realisaziun da questa fusiun da vischnancas sco exempel per eventuals futurs projects sumegliants.

Il cussegl grond vegn a sa fatschentar da questa proposta en la sessiun da november.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond