La cuminanza da lavur da las regiuns alpinas scriva ora in premi. Sa participar pon tut las abitantas ed ils abitants, las vischnancas, scolas, interpresas, federaziuns ed ulteriuras gruppas or da l'intschess da la cuminanza da lavur.

In'egliada conscienta da responsabladad en il futur emprova da metter en accord la necessitad dal svilup cun il mantegniment da l'ierta culturala e sociala d'in pajais. Il premi Arge Alp vegn perquai surdà per ideas innovativas e projects ch'utiliseschan las pussaivladads da las novas tecnologias (sco informatica, electronica, raits virtualas, apparaturas innovativas e.u.v.) per prestar a moda activa e persistenta ina contribuziun vi dal svilup. Per la regiun alpina ch'è ina sfida permanenta per ses abitants è quai fitg impurtant.

En particular duai il premi undrar las suandantas iniziativas ed activitads:
- iniziativas che creeschan plazzas da lavur resp. che contribueschan a la valur agiuntada en las regiuns muntagnardas
- iniziativas che promovan l'identitad d'ina regiun u d'ina vischnanca
- iniziativas che promovan la collavuraziun tranter divers secturs, diversas vischnancas, regiuns e divers spazis culturals
- iniziativas per ina meglra furmaziun da las forzas da lavur cun la finamira da meglierar las pussaivladads da lavurar e da la qualitad dals products
- prestaziuns particularas en il rom da la protecziun da la cuntrada e da l'ambient.

Dretg da participaziun
Il dretg da participaziun possedan tut las abitantas ed ils abitants dals pajais da la Arge Alp sco er las vischnancas, scolas, interpresas, federaziuns ed ulteriuras gruppas or da l'intschess da la cuminanza da lavur.

Criteris
Las lavurs ston satisfar als suandants criteris:
- prestaziuns exemplaras en il rom dal tema fixà
- activitads, acziuns, mesiras che prestan ina contribuziun concreta e efficazia
- tar projects da svilup, meglieraments ed invenziuns tecnicas è da preschentar il mussament ch'attesta il niz d'in institut renconuschì
- las lavurs duain er gidar a promover novas pussaivladads d'avischinar e d'arranschaments culturals.
Las lavurs dastgan esser be dus onns veglias, quai vul dir ch'ellas ston esser vegnidas realisadas en ils onns 2000 e 2001. Lavurs pli veglias na vegnan betg resguardadas.

Ulteriurs documents / contact
Chanzlia chantunala grischuna, Curdin König, Chasa grischa, Reichsgasse 35, 7001 Cuira (tel. 081 257 22 29; e-mail: Curdin.Koenig@staka.gr.ch).

Termin d'inoltraziun
L'ultim termin per inoltrar las lavurs è ils 28 da favrer 2002.

Premi e premiaziun
La premiaziun succeda en il rom da la conferenza dals schefs da las regenzas da la Arge Alp dal zercladur 2002 en il chantun Son Gagl. Il premi munta a 16'500 Euro.

Gremi: Arge Alp
Funtauna: rg chanzlia chantunala dal Grischun