La procedura da consultaziun davart il plan directiv chantunal 2000 (cooperaziun publica) è terminada. En occasiun d'ina dieta da gievgia, ils 22 da november 2001 vegn discutà a Cuira co ch'il sboz consolidà dal plan directiv duai vegnir repassà e sviluppà vinavant.

Represchentants da vischnancas, regiuns e federaziuns - quai vul dir ils purtaders d'opiniuns e da decisiuns da noss chantun - sa scuntran per dar novs impuls al svilup territorial. Il tema "svilup persistent" sco er projects da pilot regiunals vegnan a star en il center da la dieta. Igl è la quarta giada dapi 1998 ch'i ha lieu ina "dieta da november" davart il svilup territorial dal Grischun.

La realisaziun stat en il center
Entant che las occurrenzas dals dus onns precedents èn stadas colliadas fermamain cun il project plan directiv 2000, vegn la tematica da quest onn extendida. I vegn orientà e discutà davart svilups actuals e projects sin il sectur dal svilup territorial. Cun exempels concrets vegnan mussadas pussaivladads, co che la filosofia e las ponderaziuns directivas dal plan directiv chantunal pon vegnir realisadas. Ils dus workshops dal suentermezdi stattan sut il motto "Svilup territorial cun agid da projects orientads a la finamira ed a la soluziun"; ellas servan al barat d'experientschas e duain intimar a sviluppar novas ideas ed opticas. La dieta sa drizza als participads en la planisaziun, spezialmain sin il stgalim regiunal, e vegn averta da cusseglier guvernativ Klaus Huber.

Gremi: departament da l'intern e da l'economia publica dal Grischun
Funtauna: rg uffizi da planisaziun