La regenza inoltrescha al departament federal da l'intern il program
ed il preventiv 2002 per la promoziun ed il mantegniment da la lingua e
cultura rumantscha e taliana en il chantun Grischun. Las expensas
totalas vegnan calculadas cun 7.367 milliuns francs (confederaziun 64
pertschient, chantun 36 pertschient). I vegnan dumandadas contribuziuns
federalas en la summa da 4.75 milliuns francs. Ils daners duain vegnir
impundids per:
- mesiras chantunalas sco per il servetsch da translaziun, cudesch
da dretg grischun en las trais linguas chantunalas, rumantsch grischun,
scolaziun da persunas d'instrucziun e.u.v.
- sustegnair las mesiras da terzas persunas sco il servetsch da
lingua regiunal "Sling", projects da scola, mesiras regiunalas,
translaziuns da cudeschs e meds d'instrucziun e.u.v.
- contribuziuns a projects scientifics,
- contribuziuns a las organisaziuns ed instituziuns (p. ex. Lia
rumantscha e Pro Grigioni italiano),
- promoziun da las activitads editorialas,
- promoziun da la pressa rumantscha.
Agid umanitar
Als suandants projects resp. organisaziuns d'agid vegnan
conderschidas contribuziuns en la summa totala da 19'000 francs:
- a la Crusch Cotschna Svizra en favur da l'agid d'urgenza per ils
fugitivs d'Afganistan,
- a l'organisaziun d'agid CO-OPERAID en favur dal project per ils
orfens d'Aids ad Uganda,
- a l'organisaziun d'agid "Fundación para los Indios del Ecuador" en
favur dals projects "Chimborazo Verde" en la provinza Bolívar, Equador,
ed
- a la Helvetas en favur dal project "collavuraziun cun AROMA",
protecziun/cultivaziun dal territori cumpiglià dal Rio Macasías en la
Republica Dominicana.
Fatgs dal persunal
- Rainer Stephan Good, naschius 1962, da Mels, domicilià a Cuira,
daventa schef da la direcziun superiura da construcziun tar l'uffizi da
construcziun bassa dal Grischun. El entra en uffizi a l'entschatta
schaner 2002.
- La substituziun da l'inschigner superiur surpiglia a partir da
l'entschatta schaner 2002 Roger Stäubli, schef da projectaziun tar
l'uffizi da construcziun bassa.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun