La fundaziun Educaziun e svilup ha elavurà per incumbensa da la
direcziun per svilup e cooperaziun (DSC) in chalender en format grond ed
ina broschura accumpagnanta da caracter pedagogic-didactic. Il
departament d'educaziun, cultura e protecziun da l'ambient distribuescha
quest "pachet" a tuttas scolas popularas dal chantun Grischun.
La radunanza plenara da la ONU da l'atun 1998 ha declerà l'onn 2002
per l'onn internaziunal dals culms. I n'è betg casualitad che quest onn
coincidescha cun l'inscunter suprem mundial "Diesch onns suenter la
conferenza da Rio" che ha lieu il settember 2002 a Johannesburg. La
finamira da l'onn da la ONU è il svilup persistent da las regiunas
muntagnardas da l'entir mund.
Il chalender dals culms sco purschida da furmaziun per las scolas
duai accumpagnar las classas da tut ils stgalims tras l'onn da la ONU ed
uschia gidar a sensibilisar per la tematica. Per l'utilisaziun dal
chalender en l'instrucziun vegn mess a disposiziun ina broschura
accumpagnanta da caracter pedagogic-didactic.
I stat a cor a cusseglier guvernativ Claudio Lardi sco president da
la fundaziun Educaziun e svilup e sco schef dal departament d'educaziun,
cultura e protecziun da l'ambient da surdar a las scolas publicas dal
Grischun il chalender numnà e la broschura respectiva. Cun quest
preschent collia el la speranza ch'il chalender dals culms 2002 chattia
buna accoglientscha sco purschida specifica d'instrucziun en las stanzas
da scola da noss chantun e ch'el sa mussia sco fidaivel cumpogn tras il
proxim onn da scola.
Per la Svizra sco pajais muntagnard e cunzunt per il chantun
Grischun sco exempel tipic d'in chantun da muntogna munta l'onn
internaziunal dals culms ina sfida extraordinaria. Quest onn duai vegnir
utilisà per meglierar tar la populaziun la sensibilitad per in svilup
persistent da las regiuns da muntogna e d'augmentar la prontezza d'agir
per in svilup persistent en las muntognas. Noss uffants e giuvenils
duain cunzunt vegnir sensibilisads en l'instrucziun per la valur
preziusa d'in svilup persistent.
Gremi: departament d'educaziun, cultura e protecziun da l'ambient
dal chantun Grischun
Funtauna: rg uffizi per las scolas popularas e las scolinas