Il departament d'educaziun ha relaschà novas directivas che duain sustegnair ils purtaders da las scolas tar la gestiun e l'organisaziun da las classas pitschnas.

La promoziun dals scolars en las classas pitschnas cumplettescha u remplazza en ina scola multifara l'instrucziun en la scola regulara. Questa scola daventa actuala, sche las purschidas da la scola regulara fruntan sin cunfins e na pon betg satisfar avunda als basegns particulars da las scolaras e dals scolars. Quai po esser il cas tar uffants cun grondas difficultads d'emprender e da cumportament sco er tar uffants cun talents spezials.

Fin uss cumpigliava l'expressiun "classas pitschnas" la promoziun en la scola publica d'uffants cun difficultads d'emprender e da cumportament. Tenor la nova lescha da scola e las directivas circumscriva la formulaziun "promoziun en classas pitschnas integradas" er las purschidas per uffants fitg talentads resp. extraordinariamain talentads. Sche las mesiras en il rom da la scola regulara - sco per exempel l'individualisaziun da l'instrucziun u da laschar sursiglir ina classa - na tanschan betg pon quests uffants vegnir promovids suenter l'examinaziun dal servetsch psicologic da scola en il rom da classas pitschnas integradas. Per ils uffants cun in quozient d'intelligenza da 140 e dapli che han difficultads u che pon vegnir en difficultads pervia da lur talents po l'uffizi per secturs spezials da scola disponer a partir da l'onn da scola 2002/03 sin proposta dal cussegl da scola l'assegnaziun ad ina classa pitschna integrada. Las mesiras da promoziun pon vegnir realisadas da la vischnanca u dal center da sustegn da la scola chantunala grischuna a Cuira. Il center da sustegn cumenza sia lavur probablamain l'entschatta da l'onn da scola 2002/03.

Las novas directivas resguardan la lescha da scola revedida, l'ordinaziun da la regenza correspundenta ed ils concepts ch'appartegnan a quests fatgs. Cun las directivas retschaivan ils purtaders da las scolas in instrument da lavur che dat risposta a numerusas dumondas en connex cun las classas pitschnas. A l'entschatta succeda quai en lingua tudestga, a partir dal december er en rumantsch e talian. Al cumenzament da las directivas stattan insaquantas ideas fundamentalas concernent la cultura e la promoziun en classas pitschnas. Quest instrument da lavur cuntegna plinavant divers entruidaments pertutgant dumondas organisatorias ed administrativas davart la concepziun da las classas pitschnas sco er davart ils aspects pedagogics e psicologics. Plinavant anflan ins en questas directivas er indicaziuns davart la collavuraziun tranter las persunas cun la pussanza dals geniturs, las persunas dal fatg ed ils purtaders da las scolas sco er divers exempels da reglaments pertutgant l'engaschament, las qualificaziuns, la furmaziun e la scolaziun supplementara da persunas d'instrucziun sco er insaquantas rispostas sin las dumondas concernent la finanziaziun ed ils subsidis per las classas pitschnas.

Gremi: departament d'educaziun, cultura e protecziun da l'ambient dal Grischun
Funtauna: rg uffizi per secturs spezials da scola