Il provediment medical d'urgenza per lung da la A13 è vegnì remplazzà da la staziun da salvament temporara a Spleia. Er las basas da salvament a Roveredo e Mesauc èn vegnidas rinforzadas.
Cun la serrada da la galaria dal Gottard è la via dal San Bernardin (A13) daventada la ruta da transit tras las Alps cun las pli autas frequenzas per il traffic da camiuns pesants tras la Svizra.
Cuntanschibla da tuttas uras sur il clom d'urgenza 144
Fin ch'ils camiuns pon puspè far diever da la galaria dal Gottard vegn rinforzà il provediment medical d'urgenza tras la staziun da salvament a Spleia. Questa staziun fa part pertutgant l'organisaziun a la regiun d'ospitals Tusaun, che cumpiglia la A13 fin a Valragn (vitg). Ina squadra da salvament da duas persunas stat a disposiziun per l'acziun durant 24 uras. Ella posseda in vehichel da salvament bain equipà. En cas da basegn pon ins dumandar in medi d'urgenza tras il clom d'urgenza 144. Sco manader medical da la staziun da salvament è vegnì designà Peter Adrian Herzog, medi d'urgenza directiv dal Grischun. Ils custs che resultan dal fatg che la staziun da salvament stat a disposiziun vegnan surpigliads en emprima lingia dal chantun. Il chantun Grischun spera dentant che la confederaziun sa participeschia adequatamain.

Rinforz er da la vart dal sid
A la vart dal sid da la ruta dal San Bernardin èn vegnidas rinforzadas las basas da salvament a Roveredo ed a Mesauc cun persunal e material. Questas duas basas èn pia prontas per l'acziun da tuttas uras.
Per pudair vegnir a frida cun eventuals eveniments cun dapli che quatter fin tschintg blessads sin la ruta dal San Bernardin, ha il chantun Tessin concludì da collavurar stretgamain cun il chantun Grischun. A San Bernardin han ins gia pinà il material da sanitad correspundent.

Gremi: departament da sanitad dal Grischun
Funtauna: rg uffizi da sanadad