Navigation

Inhaltsbereich

  • Erste Mitteilung
  • Neuen Beitrag einfügen
Il project center d'impuls vul promover las interprendidras ed ils interprendiders giuvens. Novas fundaziuns d'interpresas en il conturn da la scol'auta da tecnica ed economia HTW, Cuira, e da la scol'auta da tecnica interstatala NTB, Buchs, duain vegnir sustegnidas en il rom da divers servetschs, da l'infrastructura e da la cussegliaziun. Il chantun ha elavurà ensemen cun la HTW e la Banca chantunala grischuna in concept per realisar in center da fundaziun (concept "Project center d'impuls"). Il center d'impuls è ina part dal center da MPM ed è integrà en la HTW a Cuira. Dal rest vegn tschertgada la collavuraziun cun il Swiss Economic Forum SEF. Il center d'impuls duai vegnir realisà a la sortida da l'autostrada Cuira sid en in stabiliment nov nua che vegnan fittads 530 meters quadrats. Questa surfatscha pussibilitescha da porscher circa 30 plazzas da lavur per interprendidras ed interprendiders giuvens.
Il basegn finanzial importa per tschintg onns probablamain 850'000 francs e duai vegnir repartì sco suonda: confederaziun 360'000 francs, chantun 250'000 francs, citad da Cuira 80'000 francs, banca chantunala 60'000 francs, assicuranzas/interpresas/federaziuns/cussegliaders e fundaziuns 100'000 francs.
Il project center d'impuls è d'impurtanza economica e regiunala e duai gidar ils onns proxims a rinforzar l'economia dal chantun Grischun. Promover fundaziuns novas d'interpresas ed ils interpriders giuvens sco er rinforzar la posiziun dal Grischun sco lieu cun scol'autas correspunda cumplainamain a las finamiras da la promoziun da l'economia ed al program da la regenza 2001 fin 2004.

Reducziun da las premias 2002: la resalva persunala po vegnir sbassada
En la sessiun da november ha il cussegl grond mess a disposiziun 55 milliuns francs (onn precedent: 46 milliuns) per la reducziun da las premias da las cassas da malsauns. Da quai tutgan 14.5 milliuns francs il chantun e 40.5 milliuns francs la confederaziun. La regenza ha fixà las premias directivas e las resalvas persunalas per la calculaziun da la reducziun da las premias 2002. Per uffants (fin 18 onns) vegn calculà cun ina premia directiva da 50 francs, per giuvenils (19 fin 25 onns) cun 134 francs e per creschids (a partir da 26 onns) cun 191 francs. Las resalvas persunalas han pudì vegnir sbassadas en cumparegliaziun cun l'onn precedent. L'onn proxim han las persunas cun las entradas las pli modestas d'impunder tschintg pertschient (l'onn 2001 èsi stà sis pertschient) da lur entradas imputablas per pajar las premias da la cassa da malsauns. Cun las entradas creschentas s'augmenta er la resalva persunala fin a diesch pertschient (2001: 12.4 pertschient).

Da las regiuns e las vischnancas
Ils uffizis da stadi civil da Churwalden/Parpan, Malix, Praden e Tschiertschen s'uneschan ad in sulet uffizi da stadi civil cun il num "Zivilstandsamt des Kreises Churwalden" cun sedia a Churwalden. La reuniun cuntanscha vigur legala il pli tard il cumenzament da matg 2002.
A l'Organizzazione regionale del Moesano (ORMO) vegn garantida ina contribuziun da dudesch pertschient dals custs da 180'000 francs per il studi davart la realisabladad d'in parc naziunal en il territori dal Piz Valragn/Adula. La contribuziun chantunala è colliada cun l'obligaziun d'examinar en il cas ch'il project dal parc naziunal na reussiss betg la varianta d'in parc regiunal.
Il palantschieu sura picturà da la baselgia da son Martin a Ziràn è in monument d'art d'impurtanza internaziunala. Quel sto vegnir tractà urgentamain cunter l'infecziun da bulieus e conservà. I vegn fatg quint cun custs totals da var 2.1 milliuns francs. A la fundaziun "Kirchendecke Zillis" vegn conderschida ina contribuziun da 35 pertschient vi dals custs che resultan da questa lavur.

Consultaziun a la confederaziun
Uschè fitg sco la regenza grischuna sustegna la nova lescha davart il martgà d'electricitad (LME), uschè cler refusescha ella il sboz da l'ordinaziun davart il martgà d'electricitad (OME). Quella posiziun correspunda a la posiziun da la conferenza da las regenzas dals chantuns alpins. Il sboz satisfà per part als interess dal chantun Grischun annunziads pli baud, la versiun preschenta da la OME na po dentant betg influenzar positivamain la votaziun davart la LME. Crititgà vegn cunzunt la concisadad da la reglamentaziun uschia ch'ins na chatta betg spazi per schliaziuns che resguardan las branschas. Cun tutta insistenza vegn refusada la reglamentaziun da las valurs da basa per eruir l'indemnisaziun dal dretg da passar cun conducts. Cun la valur da basa "valur cudeschada" vegn offendida la branscha d'electricitad tant materialmain sco er politicamain. I vegn proponì da fixar la "valur da reacquisaziun" sco valur da basa.

Elecziuns e votaziuns dals 3 da mars 2002
Ils 3 da mars 2002 ha lieu l'emprim scrutini da las elecziuns da la regenza (secund scrutini: dumengia, ils 24 da mars 2002). Plinavant vegn votà davart dus projects da votaziun federala e trais projects da votaziun chantunala.
Ils suandants projects da votaziun federala vegnan suttamess a la votaziun dal pievel:
- l'iniziativa dal pievel per l'entrada da la Svizra en la l'Organisaziun da las Naziuns unidas (ONU), e
- l'iniziativa per ina durada reducida dal temp da lavur.
Ils suandants projects da votaziun chantunala vegnan suttamess a la votaziun dal pievel:
- la cuntraproposta dal cussegl grond a l'iniziativa chantunala dal pievel per premias supportablas da las cassas da malsauns,
- la revisiun parziala da la lescha davart l'assicuranza da malsauns e la reducziun da las premias,
- la contribuziun chantunala (credit d'impegn) da quatter milliuns francs per il campiunadi mundial da skis alpins 2003 da la FIS a San Murezzan.

Chanzlia chantunala grischuna

Gremi: regenza
Funtauna: rg chanzlia chantunala grischuna
Neuer Artikel