Il chantun Grischun ha l'intenziun da separticipar cun 1.14 milliuns francs al chapital d'aczias da la Crossair. La regenza suttametta in messadi correspundent al cussegl grond.

La schliaziun skizzada dal cussegl federal e da l'economia prevesa da transferir ina part dal manaschi da la Swissair da fin uss sin la Crossair. L'agen chapital da la Crossair, necessari per quest intent, importa radund 2,97 milliardas francs; da quella summa duai la confederaziun contribuir radund 600 milliuns, ils chantuns radund 400 milliuns e las vischnancas radund 50 milliuns francs. Il maun public surpiglia uschia radund ina milliarda francs dal nov chapital d'aczias da la Crossair. Ultra dal chantun Turitg che vul sa participar cun 300 milliuns a la nova Crossair, han signalisà er auters chantuns da surpigliar surtut ina part fixa (Basilea-Citad 26 milliuns, Basilea-Champagna 5 milliuns, Genevra 10 milliuns francs). La conferenza dals directurs da finanzas ha sbozzà ina clav da distribuziun che duai reglar la repartiziun da l'import restant da 59 milliuns francs sin ils chantuns restants. Questa clav prevesa ch'il Grischun sa participeschia cun in import da quasi 1.14 milliuns francs. En cas d'in pretsch da 56 francs per aczia tutga quai radund 20'300 aczias per il chantun Grischun.
L'engaschament finanzial dal chantun Grischun correspunda d'ina vart ad in gest da solidaritad vers ils chantuns pertutgads da la decadenza da la Swissair e vers ils blers collavuraturs smanatschads en lur existenza professiunala. La participaziun duai dentant er succeder ord la persvasiun ch'ina societad aviatica efficazia e bain etablilda sin il plaun internaziunal possia esser da gronda muntada per l'economia e per il turissem da la Svizra ed uschia era per il Grischun.
La regenza suttametta al cussegl grond in messadi per la participaziun al chapital d'aczias da la Crossair SA. Sch'il parlament sustegna er questa participaziun, vegn il conclus correspundent suttamess al referendum da finanzas facultativ.

In'egualisaziun da chareschia d'in pertschient per il persunal dal stadi
Per egualisar la chareschia per il persunal chantunal e per las persunas d'instrucziun da las scolas popularas vegni concedì a partir dal 1. da schaner 2002 in supplement da chareschia dad in pertschient. Uschia vegn la chareschia na egualisada dals davos onns reducida da 2,9 sin 2,1 pertschient, entant che 0,2 pertschients pertutgant la chareschia effectiva da l'onn passà.

Il chantun aquista immobiglias a Cuira
Per pudair engrondir la scola chantunala ha la regenza approvà a l'entschatta da l'onn la cumpra dal Constantineum. Per il medem intent duai supplementarmain er l'immobiglia "Münzmühle" vegnir acquistada. Questa ha servì durant ils davos decennis sco chasa da scola a la "Rudolf-Steiner-Schule". Dentant è vegnì sistì il manaschi da scola. Il pretsch da cumpra importa 1.7 milliuns francs. La cassa da pensiun chantunala vul acquistar da la cassa da pensiun da Zug las duas chasas da fatschenta a la Steinbruchstrasse 18 e 20. La regenza approvescha questa finamira. Il pretsch da cumpra per domadus objects importa 5.5 milliuns francs.

La consultaziun tar l'ordinaziun davart il notariat vegn dada libra
La regenza dat liber per la consultaziun il sboz concernent la revisiun totala da l'ordinaziun davart il notariat. Cun questa revisiun duain tuttas persunas da notariat vegnir messas sut la surveglianza da la cumissiun da notariat. La cumissiun sco autoritad disciplinara e da surveglianza vegn augmentada. Cunter decisiuns da quella duai pudair vegnir appellà a la dretgira administrativa. La documentaziun per la consultaziun po vegnir retratga dal DGPS, il termin scada a la fin da mars 2002.

Fusiun dals uffizis da stadi civil en l'Engiadin'ota
Ils indesch uffizis da stadi civil da fin uss dal circul da l'Engiadin'ota vegnan fusiunads a dus uffizis: L'uffizi da stadi civil da San Murezzan cumpiglia da nov Schlarigna, Silvaplana, Segl e San Murezzan, entant che l'uffizi da stadi civil da Samedan consista da nov da Bever, La punt.Chamues-ch, Madulain, Puntraschigna, Samedam, S-chanf e Zuoz. Las fusiuns valan a partir il pli tard il mars 2002.

Consultaziuns a la confederaziun
La regenza prenda posiziun vers il sboz per ina revisiun parziala da la lescha federala davart la protecziun da datas (LPD) e vers il "protocol supplementar tar la cunvegna davart la protecziun da l'uman tar l'elavuraziun automatica da datas che sa refereschan a persunas concernent las autoritads da surveglianza e la transmissiun da datas sur ils cunfins" sco er vers il sboz per ina "lescha federala davart l'elavuraziun da datas dal sectur dad esters e d'asil en in sistem d'infurmaziun".
La revisiun da la LPD e dal protocol supplementar ha particularmain la finamira d'augmentar la transparenza tar l'acquisiziun da datas. Ella introducescha per persunas privatas e per ils organs da la confederaziun l'obligaziun d'infurmar las persunas pertutgadas, sch'i vegn rimnà datas da persunas dignas da protecziun e profils da persunalitads. Cun la segunda lescha federala duai vegnir creada la basa legala per il nov sistem "Esters 2000".
La regenza grischuna beneventa da princip las stentas per meglierar la protecziun da datas. Ella stimulescha tranter auter da rinforzar ils pli impurtants princips "legitimitad", "opportunitad" e "destinaziun" e da reglar cleramain il status existent da la banca da datas dal chantun.

Chanzlia chantunala dal Grischun

Gremi: Regenza
Funtauna: rg Chanzlia chantunala dal Grischun