La regenza relascha ina nova ordinaziun inclusiv las directivas davart construir ed installar indrizs da scola e da sport. Las novaziuns las pli impurtantas cumpiglian ils suandants secturs:
-integraziun pli intensiva d'uffants cun anomalias fisicas, spiertalas e psichicas. Quai premetta furmas d'instrucziun spezialas e mesiras architectonicas correspundentas.
-meglras cundiziuns generalas per l'integraziun da las novas tecnologias d'infurmaziun e da communicaziun tras infrastructuras localas, architectonicas ed infrastructuralas (indrizs ed installaziuns per l'informatica).
-augment da las mesiras minimalas per hallas da sport.
Ils novs decrets èn concepids en emprima lingia sco agid per architectas ed architects, vischnancas e cumissiuns da construcziun. Els vegnan ad entrar en vigur l'entschatta da l'onn 2002 e publitgads tant en furma stampada sco er en l'internet.

Contribuziuns culturalas
I vegnan prestadas contribuziuns e garanzias da deficit en l'import total da 393'000 francs a las suandantas ovras ed occurrenzas culturalas:
-trais concerts dal Collegium Vocale Turitg ensemen cun la Schola da las dominicanas dal Glion dals 31 da december 2001 fin ils 2 da schaner 2002 a Glion, Zuoz e Cuira (Vespras da Son Gion da Monteverdi),
-concerts dal chor maschadà da la scola media evangelica da Schiers dals 8/9 da favrer 2002 a Claustra ed a Maiavilla (ovras da Caldara e Vivaldi),
-trais concerts a pretsch d'entrada reducì en il rom dal festival da musica a San Murezzan "Snow and Symphony" il mars 2002 (concert per uffants/concert per tuots/Opern-Gala en il Rondo a Puntraschigna),
-concerts da l'uniun d'orchester da Cuira il mars/avrigl 2002 a Cuira, Landquart ed a Samedan (ovras da Johann e Josef Strauss),
-concerts dal chor da la scola chantunala e da l'orchester da l'universitad da Montpellier en il rom d'in barat cultural l'avrigl/matg 2002 a Montpellier ed a Cuira ("Gloria" da Francis Poulenc e parts da la musica da Chalavaina dad Otto Barblan),
-concert dal trio d'Avalon dals 6 da zercladur 2002 a Cuira cun primaudiziun d'ina ovra da David Sontòn-Caflisch,
-concerts dal rudè da chant da Tavau dals 16/17 da november 2002 a Tavau ed a Cuira (ovras da Beethoven),
-stagiun 2001/02 dal teater da la citad da Cuira,
-trais atgnas producziuns da la Klibühni durant l'onn 2002,
-project annual 2002 "Voglio vedere le mie montagne" dal teater Alpodrom,
-duas producziuns dal teater Muntanellas ("Olgas Raum" da Dea Loher e "Die Panne" da Dürrenmatt) il favrer/avrigl 2002 a Tusaun ed a la clinica Beverin,
-represchentaziun al liber dal toc "Ein Engel kommt nach Babylon" da Dürrenmatt tras il Teater Grischun l'avust 2002 a Cuira,
-ediziun dal cudesch "Albanatscha: Architektur der Energie als Appell" da Michael Jakob,
-exposiziun "Temporary Discomfort I+II" dal fotograf Jules Spinatsch il schaner/favrer 2002 en la galaria Luciano Fasciati a Cuira,
-ediziun d'in catalog a chaschun d'ina exposiziun singula da Pascale Wiedemann dals 20 da schaner fin ils 3 da mars 2002 en la galaria da la citad da Villingen-Schwenningen (D),
-ediziun d'in catalog a chaschun d'ina exposiziun da Ladina Gaudenz il mars 2002 en la galaria Luciano Fasciati a Cuira,
-ediziun dal cudesch "Feldis, dein Sonntagsgesicht" (tudestg/rumantsch) da Plasch Barandun,
-ediziun dal tom 3 da l'autobiografia da Peter Paul Moser ed
-ediziun dal cudesch da giaglioffa cun las diesch meglras lavurs d'ina concurrenza d'istorgias curtas da l'uniun da traffic da Segl.

Contribuziuns da sport
I vegnan conderschidas contribuziuns da sport-toto en la summa totala da circa 770'000 francs a 54 uniuns ed organisaziuns da sport.

Repartiziun da la "taglia sin il vinars"
Il retgav net dal chantun or da l'imposiziun da taglia dal commerzi en detagl cun vinars e da la vendita da vinars vegn duvrà mintgamai a mesadad per intents d'util public e per promover il traffic d'esters. En favur d'intents d'util public vegnan mess a disposiziun 448'800 francs a differentas organisaziuns, instituziuns ed a differents projects, tranter auter a chasas d'uffants e da scola, ad organisaziuns ed instituziuns d'impedids sco er ad organisaziuns per l'agid a sasez.

Consultaziuns a la confederaziun
Ins vul fixar in artitgel davart las universitads en la constituziun federala. Quest artitgel ha l'intenziun da diriger a moda collegiala l'entir sectur da las universitads e vul crear ina basa solida per la politica universitara concepida a moda cumplessiva ed accordada naziunalmain. La regenza grischuna beneventa quest project che vul meglierar l'efficacitad dal sistem universitar e segirar a lunga vista la qualitad da l'instrucziun e la perscrutaziun.
La confederaziun vul rinforzar la controlla da la segirezza tecnica per implants, vehichels ed apparats (tranter auter implants atomars ed implants da fermada, conducts da bischens, pendicularas, traffic public, bartgas, vehichels a motor, vias, binaris ed apparats da tutta spezia). Per quest intent duai vegnir creada ina uschenumnada agentura da segirezza en il departament federal d'ambient, traffic, energia e communicaziun. Per garantir er en il futur la segirezza, vegn descritta exactamain la responsabladad dals directurs da tals indrizs. La regenza refusescha divers puncts principals dal sboz d'ina lescha federala davart la controlla da la segirezza tecnica (LCST). Sia posiziun correspunda essenzialmain a quella da la conferenza da las regenzas dals chantuns da muntogna, da la conferenza da las regenzas chantunalas e da la conferenza dals directurs chantunals dal traffic public. I vegn proponì da refusar il sboz e da mantegnair la regulaziun tenor il sistem actual.
Il sboz preliminar da la lescha federala davart la protecziun dals animals vegn beneventà da la regenza. El cumpiglia tranter auter il sectur da l'allevament d'animals ed agiunscha la dignitad da l'animal sco object da protecziun. Il cussegl federal duai pudair declerar il tegnair animals privlus (p.ex. ils uschenumnads chauns da cumbat) per obligà d'annunziar e da dumandar ina permissiun. Ina schluccada dal scumond da stgannar vegn refusada.

Da regiuns e vischnancas
Il plan directiv regiunal modifitgà "concept plazzas da campadi" da la regiun Surselva vegn approvà cun resalvas e precisaziuns.
Las midadas en la lescha davart las taxas da cura da Sursaissa ed en la lescha da taglia da Tschlin vegnan approvadas.

Persunal
Roberto Berolino, naschì 1966, da Mustér e Sesto Calende (Italia), domicilià a Domat daventa manader d'applicaziuns en l'uffizi d'informatica. El cumenza l'entschatta d'avrigl 2002.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun