Navigation

Inhaltsbereich

  • Erste Mitteilung
  • Neuen Beitrag einfügen
Mez december ha cumenzà la cumissiun predeliberanta dal cussegl grond cun bler elan sia lavur. Ella ha mess a sesezza finamiras ambiziusas.
A chaschun da l'emprima sesida ha fixà la cumissiun predeliberanta dal cussegl grond, che consista da 21 persunas e che vegn presidiada da deputada Barla Cahannes Renggli, en preschientscha da la presidenta da la regenza Eveline Widmer-Schlumpf sia moda da lavurar ed il proceder. Ella è unanimamain da l'opiniun da discutar la proposta da la regenza l'emprim en quatter giuntas tematicas. Be uschia po la cumissiun predeliberanta discutar da rudien tut las dumondas e tuttina lavurar effizientamain. Suenter vegn a tractar l'entira cumissiun il sboz. Las giuntas cumenzan cun la tractaziun materiala da la revisiun totala da la constituziun chantunala uschespert che la missiva da la regenza è avant maun. Tenor la presidenta da la regenza Eveline Widmer-Schlumpf vegn la missiva ad esser avant maun la fin da schaner 2002. Fin la fin da mars 2002 duess esser a fin la predeliberaziun en las giuntas. Suenter succeda la cussegliaziun en il plenum, avant ch'il cussegl grond vegn a cumenzar cun la discussiun da la revisiun totala da la constituziun chantunala a chaschun d'ina sessiun extraordinaria en il zercladur 2002.

Al cumenzament da lur lavur èn ils commembers da la cumissiun predeliberanta sa laschads orientar davart il stan dal project da refurma. La presidenta da la regenza Eveline Widmer-Schlumpf ha fatg endament tge finamiras che la revisiun totala persequitescha. I va per segirar l'abilitad d'agir dal stadi per l'avegnir. Professer Tobias Jaag che ha persequità las lavurs dapi l'onn 1995 sco cussegliader scientific, ha mussà la libertad d'agir dal chantun Grischun ed ha explitgà il basegn d'agir concret. Frank Schuler, il manader dal secretariat per la nova constituziun ha informà davart il sboz da la cumissiun da constituziun ed ils resultats da la consultaziun.

La cumissiun ha tschertgà ina cumposiziun equivalenta da las singulas giuntas. Be uschia pon questas cumissiuns discutar sin ina vasta basa lur secturs. Mintga commember da la cumissiun fa part d'ina giunta. Barla Cahannes Renggli ed Andrea Brüesch sco presidenta e vicepresident da la cumissiun fan part da duas giuntas. La determinaziun tematica per questas giuntas è vegnida fixada sunadantamain:
-1. giunta: preambel, disposiziuns generalas, princips generals da l'activitad dal stadi
-2. giunta: dretgs dal pievel, procedura electorala, midada da la constituziun
-3. giunta: autoritads e dretgiras, surveglianza da finanzas, disposiziuns finalas
-4. giunta: structuraziun dal chantun, incumbensas publicas, urden da finanzas, stadi e baselgias

Ils 28 da settember 1997 han las votantas ed ils votants decidì da reveder totalmain la constituziun chantunala dal Grischun. Il schaner 1998 ha numnà la regenza ina cumissiun da 30 persunas per la constituziun ed incumbensà quella cun l'elavuraziun d'ina nova constituziun. Davart il sboz da la cumissiun han pudì s'exprimer persunas e gruppaziuns interessadas fin la fin da mars 2001. Sa basond sin ils resultats da la consultaziun ha il secretariat per la nova constituziun repassà il sboz tenor las directivas da la regenza.

Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond
Neuer Artikel